बाढीले पुल बगाउँदा मनाङ जान मुस्किल, ढुवानी नै रोकियो
असार १३, २०७६ शुक्रबार १५:२३:०
बेसीसहर : हिमाली जिल्ला मनाङ र लमजुङ जोड्ने म्यार्दीखोलाको बेलिब्रिज बाढीले बगाएपछि मनाङमा ढुवानी ठप्प भएको छ ।
मनाङ जाने एक मात्र बेसीसहर–चामे सडकमा रहेको उक्त पुल बगाएपपछि खाद्यान्यलगायत निर्माण सामाग्री मनाङमा भित्रन नसकेको हो । असार ८ गते दिउँसोको भीषण बाढीले पुल बगाएको थियो ।
सडक सञ्चालन हुन नसक्दा दैनिक रुपमा आउ–जाउ गर्न समेत मुस्किल भएको स्थानीयको गुनासो छ । चामेका पाल्साङ गुरुङका अनुसार ६ दिनदेखि मनाङमा सामान ढुवानी हुन सकेको छैन । पसल सञ्चालकले पनि थप सामान ल्याउन सकेका छैनन् ।
लमजुङको बेसीसहर, पोखरा, काठमाडौंलगायत ठाउँबाट खाद्यान्न, तरकारी, फलफूल, मासुजन्य वस्तु साथै निर्माण सामाग्री ढुवानी गर्दै आएका स्थानीय सडक बन्द भएपछि समस्यामा परेका छन् ।
डिभिजन सडक कार्यालय दमौलीका डिभिजन इन्जिनियर विष्णुप्रसाद काफ्लेका अनुसार म्यार्दीखोलाको वारी र पारी डोजर लगाएर भासिएको ठाउँ पुर्ने काम भइरहेको छ । छिट्टै बेलिब्रिज निर्माणको काम सुरु गरिने उनले बताए । उनले भने, ‘प्राविधिकले अध्ययन गरेर आएको छ । मानिस हिँड्नका लागि बाटो बनाउँदैछौँ, बेलिब्रिजको काम पनि छिटै सुरु गर्छौँ ।’
प्रतिक्रिया दिनुहोस !
