बेंसीसहर : लमजुङबाट एसईई परीक्षामा सहभागीमध्ये तीनजनाले जीपीए ४ ल्याएका छन्। मस्र्याङदी गाउँपालिका ३ खुदीस्थित हिमचुली आवसीय माध्यमिक विद्यालयकी रचना सुयेल र फ्युचर स्टार आवासीय मावि सिउँडीबार, भोटेओडारका आशिष रानाभाटले बराबर ३ दशमलव ९५ जीपीए ल्याएका छन्।
हिमचुली आवासिय माविका प्रिन्सिपल रामचन्द्र भण्डारीका अनुसार रचनाले नेपाली विषयबाहेक सबै विषयमा ४ जीपीए ल्याएकी छन्। नेपालीमा भने ३ दशमलव ६ जीपीए आएको छ। रचनाकी आमा निर्मला थापाले छोरीले जिल्लामै धेरै जीपीए ल्याएको खबरले खुशी मिलेको बताइन्।
फ्युचर स्टार आवासीय मावि सिउँडीबारका आशिष रानाभाटले ३ दशमलव ९५ जीपीए ल्याएको विद्यालयका निर्देशक बाबुराम पौडेलले बताए। सामुदायिकतर्फ जनकल्याण माविउदीपुरका शिशिर अधिकारीले ३ दशमलव ९० जीपीए ल्याएका छन्। अधिकारी मेहेनेती र लगनशील विद्यार्थी भएकाले धेरै अंक ल्याउन सफल भएको र यसले विद्यालय परिवार गौरवान्वित भएको विद्यालयका प्रधानाध्यापक सूर्यबहादुर अधिकारीले बताए।
युनिभर्सल एकेडेमी बेंसीसहरका निशान रावतले ३ दशमलव ९० जीपीए ल्याएका छन्। यसैगरी, ल्याण्डस्टार आवासीय मावि बेंसीसहरका शैलेष पौडेलले ३ दशमलव ९० जीपीए ल्याएका छन्।
अर्थली प्याराडाइज आवासीय माविका प्रिन्सिपल उद्धव घिमिरेले गणित विषयमा प्राक्टिकलको नम्बर जोडेर आएको र एच्छिक दोस्रो वातावरण विज्ञान विषयको परीक्षाफल नजोडिकन विद्यार्थीको जीपीए तयार भएकाले परीक्षाफलले भ्रम पैदा गरेको बताए।
शिक्षा विकास तथा समन्वय इकाई लमजुङका अनुसार यस वर्ष सामुदायिक ७९ र निजी २१ गरी १ सय विद्यालयका २ हजार ९ सय ९० परीक्षार्थीले एसईई परीक्षाको प्रवेशपत्र लिएका थिए।
यसमा १ हजार ६ सय १४ छात्रा र १हजार ३ सय ७६ छात्र थिए। ग्रेड वृद्धिका लागि ३० जना परीक्षार्थी सहभागी भएका थिए। जिल्लामा १८ परीक्षा केन्द्रबाट परीक्षा सञ्चालन गरिएको थियो।
प्रतिक्रिया दिनुहोस !
