६० ओभरसम्म नटआउट, १७४ बलमा ३६ रन
विश्वकप क्रिकेटको इतिहासमा चर्चित भारतीय खेलाडी सुनील गावस्करको नाममा एउटा गजबको कीर्तिमान छ । उनले सन् १९७५ मा भएको पहिलो विश्वकपमा उक्त कीर्तिमान बनाएका थिए । त्यतिबेला विश्वकप क्रिकेटको प्रत्येक पाली ६० ओभरको हुन्थ्यो । भारत र इङ्ल्यान्डबीचको खेलमा इङ्ल्यान्डले पहिले ब्याटिङ गर्दै चार विकेट गुमाएर ३३४ रन बनाएको थियो । त्यसपछि भारत जवाफी ब्याटिङमा ओर्लियो ।
भारतका लागि ओपनर ब्याट्सम्यानद्वय गावस्कर र एकनाथ सोल्कर पाली सुरु गर्न आए । उक्त खेलमा गावस्कर ६० ओभरसम्म अविजित रहे । तर, उनले ३६ रनमात्र बनाउन सके । खेलका क्रममा उनले १७४ बलको सामना गरी एक चौका मात्र हिर्काएका थिए ।
उक्त खेलमा भारतले ६० ओभरमा तीन विकेट गुमाएर १३२ रनमात्र बनाउन सक्यो । खेलमा भारत २०२ रनको विशाल अन्तरले पराजित भएको थियो । त्यतिबेला गावस्करको ब्याटिङले निकै चर्चा पाएको थियो भने उनको व्यापक आलोचना पनि भएको थियो ।