जित्न पर्ने दबाबमा श्रीलंका
चेस्टर ली स्ट्रिट : जारी विश्वकप क्रिकेटको सोमबार हुने खेलमा दक्षिण एसियाली टोली श्रीलंकाले क्यारेबियन टोली वेस्ट इन्डिजको सामना गर्दैछ । उक्त खेल चेस्टर ली स्ट्रिटस्थित रिभर साइड ग्राउन्डमा नेपाली समयअनुसार दिउँसो ३ :१५ बजे सुरु हुनेछ । श्रीलंका र वेस्ट इन्डिज दुवै पहिलो संस्करणदेखि नै विश्वकपमा सहभागी हुँदै आएका टोली हुन् ।
पहिलो र दोस्रो विश्वकपको उपाधि जितेको वेस्ट इन्डिज तेस्रो संस्करणमा भने फाइनलमा पराजित भएको थियो । त्यसयता वेस्ट इन्डिज फाइनलसम्म पनि पुग्न सकेको छैन् । श्रीलंकाले भने सन् १९९६ मा छैटौं संस्करणको उपाधि उचालेको थियो । सन् २००७ र सन् २०११ मा भने श्रीलंकाली टोली फाइनलमा पराजित भएको थियो ।
पछिल्लो समय अन्तर्राष्ट्रिय एकदिवसीय क्रिकेटमा यी दुवै टोलीको प्रदर्शन सन्तोषजनक देखिँदैन । यी दुवै टोलीको ब्याटिङ खासै लयमा देखिँदैन भने बलिङ तुलनात्मक रूपमा राम्रो छ । जारी विश्वकपमा यी दुवै टोलीले सात/सात खेल खेलिसकेका छन् । वेस्ट इन्डिज भने उपाधि होडबाट बाहिरिसकेको छ । त्यसैले अबको खेलमा वेस्ट इन्डिजसँग गुमाउनका लागि केही बाँकी छैन ।
एक खेलमा मात्रै जित हात पारेको वेस्ट इन्डिज ५ खेलमा पराजित भएको छ । वेस्ट इन्डिजको एक खेल वर्षाका कारण रद्द भएको थियो । पहिलो खेलमा सानदार जित हात पारेको क्यारेबियन टोलीका लगातार पराजयको शिकार बनेको छ। श्रीलंकाको भने सेमिफाइनलमा पुग्ने झिनो सम्भावना अझै जीवितै छ । सेमिफाइनल प्रवेशको सम्भावना जीवित राख्न श्रीलंकाले बाँकी दुवै खेल जित्नै पर्ने हुन्छ ।
श्रीलंकाले हालसम्म खेलेको सातमध्ये दुई खेलमा जित हात पारेको छ भने तीन खेलमा पराजय भोगेको छ । श्रीलंकाको दुई खेल वर्षाका कारण रद्द भएको थियो । त्यसको प्रत्यक्ष असर श्रीलंकाको सेमिफाइनल यात्रामा परेको छ । हालसम्म यी दुई टोली ५६ पटक एकदिवसीय अन्तर्राष्ट्रिय क्रिकेटमा आपसमा भिडेका छन् ।
यी दुई टोलीबीच खेलिएको एकदिवसीय क्रिकेटमा वेस्ट इन्डिजले २८ खेल जितेको छ भने श्रीलंकाले २५ खेलेको नतिजालाई आफ्नो पक्षमा पारेको छ । तीन खेल भने अनिर्णित रूपमा सकिएको छ । यी दुई टोलीबीच खेलिएको पछिल्ला पाँच एकदिवसीय खेलमा भने श्रीलंकाले चार र वेस्ट इन्डिजले एक खेल जितेका छन् ।
यसैगरी, यसअघिको विश्वकपमा यी दुई टोलीबीच आठ पटक भिडन्त भएको छ । त्यसमा पनि श्रीलंकाभन्दा वेस्ट इन्डिज केही बलियो देखिन्छ । आठमध्ये चार खेलमा वेस्ट इन्डिज विजयी भएको छ । तीन खेलमा श्रीलंकाले जित हात पारेको छ भने एक खेल अनिर्णित रूपमा सकिएको छ । जारी विश्वकपको बाँकी दुवै खेलमा जित हात पार्न सके श्रीलंकाको १० अंक पुग्नेछ । त्यसपछि अन्य टोलीको प्रदर्शनले श्रीलंकाको आगामी यात्रा निर्धारण गर्नेछ । वेस्ट इन्डिजसँगको खेलमा पराजित भए श्रीलंका पनि उपाधि होडबाट बाहिरिने निश्चित छ ।
आजको खेल
श्रीलंकाविरुद्ध वेस्ट इन्डिज
रिभर साइड ग्राउन्ड (दिउँसो ३ :१५ बजे)
एकदिवसीयमा दुई टोली
कुल : ५६ खेल
वेस्ट इन्डिज विजयी : २८ खेल
श्रीलंका विजयी : २५ खेल
अनिर्णित : ३ खेल
विश्वकपमा दुई टोली
कुल : ८ खेल
वेस्ट इन्डिज विजयी : ४ खेल
श्रीलंका विजयी : ३ खेल
अनिर्णित : १ खेल