एजेन्सी : क्लब फुटबलमा बार्सिलनाबाट ठूलो सफलता हासिल गरेका अर्जेन्टिनाका फुटबल स्टार लियोनल मेसीले राष्ट्रिय टोलीका लागि उपाधि जिताउन सकेका छैनन् । ब्राजिलमा जारी कोपा अमेरिका फुटबल प्रतियोगिताको ४६औं संस्करणको सेमिफाइनलमा ब्राजिलसँग पराजित भएसँगै मेसीको झिनो आशा पनि निराशामा परिणत भयो ।
मेसीले सन २००५ मा अर्जेन्टिनाको राष्ट्रिय टोलीमा डेब्यु गरेका थिए । विश्वकपमा भने मेसी २०१० देखि टोलीमा परेका थिए । ब्राजिलमा भएको २०१४ को विश्वकप फाइनलसम्म पुगेको अर्जेन्टिना जर्मनसँग पराजित भई उपाधिबाट बञ्चित भयो । त्यसपछि २०१५ मा भएको कोपा अमेरिकाको फाइनलमा पुगेको मेसीको टोली अर्जेन्टिना चिलीसँग पेनाल्टी सुटआउटमा पराजित भयो ।
प्रतियोगिता सुरु भएको १००औं वर्षको उपलक्ष्यमा २०१६ मा कोपा अमेरिकाको विषेश संस्करण आयोजना गरिएको थियो । यसमा पनि फाइनलमा पुगेको अर्जेन्टिना पूरानै प्रतिद्वन्द्वी चिलीसँग पेनाल्टी सुटआउट मै पराजित भयो । यस पराजयपछि मेसीले राष्ट्रिय टोलीबाट सन्यास लिएको घोषणा गरेका थिए । चौतर्फी दबाबका कारण केही महिनापछि मेसीले सन्यास फिर्ता लिए ।
२०१८ को विश्वकपमा अर्जेन्टिना निकै कठीनसँग अन्तिम १६ सम्म मात्रै पुग्न सक्यो। यस पटकको कोपा अमेरिकामा पनि अर्नेन्टिनाले नकआउट चरणमा स्थान बनाउन निकै संघर्ष गर्यो ।
प्रतियोगिता सुरु हुनअघि एक टेलिभिजनसँग कुरा गर्ने क्रममा मेसीले अर्जेन्टिना यस पटक दाबेदारको रुपमा नरहेको भनी आफ्नो टोलीको कमजोरी स्विकारी सकेका थिए ।
गत विश्पकपमा राम्रो प्रदर्शन गर्ने नसक्दा मेसीको जादु अब चल्न छोड्यो भनी आलोचना भएको थियो । तर लिग फुटबलमा गत सिजनको उनले निकै राम्रो प्रदर्शन गरे । यसै सिजन बार्सिलोनको कप्तानको जिम्मेबारी पाएका मेसी ला लिगा र च्याम्पियन्स लिगमा सर्वाधिक गोलकर्ता बन्न सफल भए ।
अर्जेन्टिनी टोलीको खस्कँदै गएको प्रदर्शन मेसीको राष्ट्रका लागि उपाधि दिलाउने सपनाको बाधक बनिरहेको छ ।
प्रतिक्रिया दिनुहोस !
