४७ स्थानमा उपनिर्वाचनको तयारी, मतदातामा नाम दर्ता गर्न आग्रह

काठमाडौं : निर्वाचन आयोगले विभिन्न कारणले रिक्त ४७ स्थानमा उपनिर्वाचनको तयारी गरेको छ। प्रतिनिधिसभा सदस्य १, प्रदेशसभा सदस्य ३, गाउँपालिका अध्यक्ष÷उपाध्यक्ष ४, नगरपालिकाका प्रमुख १ र वडाध्यक्ष ३८ पद रिक्त रहेको आयोगले जनाएको छ।

आयोग प्रवक्ता शंकरप्रसाद खरेलले बिहीबार प्रेस विज्ञप्तिमार्फत यसै वर्षभित्र उपनिर्वाचन गर्न आवश्यक तयारी गरिरहेको जनाएका छन्। ‘निर्वाचनमा भाग लिन मतदाता नामावलीमा नाम रहनु अनिवार्य छ’, विज्ञप्तिमा लेखिएको छ, ‘त्यसैले नाम दर्ता गराउन छुट भएका योग्य नागरिकले नागरिकताको प्रमाणपत्रसहित आफ्नो स्थायी ठेगाना रहेको जिल्लास्थित जिल्ला निर्वाचन कार्यालय, जिल्ला प्रशासन कार्यालय र मतदाता दर्ता कार्य सञ्चालन भइरहेको इलाका प्रशासन कार्यालयमध्ये पायक पर्ने कार्यालयमा गई मतदाता नामावलीमा नाम दर्ता गराउनु हुन जानकारी गराइन्छ।’

आर्थिक वर्ष २०७६/७७ को वार्षिक नीति तथा कार्यक्रममा यही वर्षभित्र उपनिर्वाचनका काम सम्पन्न गरिने उल्लेख छ। आयोगले संघ, प्रदेश र स्थानीय तहका लागि २०७४ मा निर्वाचन गरेको थियो।

• उपनिर्वाचन अझै अनिश्चित, ३६ वडाध्यक्ष र ८६४ वडा सदस्य रिक्त
• उपनिर्वाचनमा भइरहेको ढिलाइबारे राष्ट्रपतिको चासो
• धकेलिँदै उपनिर्वाचन