वेस्ट इन्डिजलाई सान्त्वना जित, अफगानिस्तान अंकविहीन
लन्डन : आईसीसी एकदिवसीय विश्वकप क्रिकेटअन्तर्गत बिहीबार भएको खेलमा वेस्ट इन्डिज विजयी भएको छ । सेमिफाइनल होडबाट बाहिरिसकेको वेस्ट इन्डिजले समूह चरणको आफ्नो अन्तिम खेलमा अफगानिस्तानलाई २३ रनले पराजित गरेको हो ।
जारी विश्वकपमा वेस्ट इन्डिजको दोस्रो जित हो । आफूले खेलेका नौ खेलमा वेस्ट इन्डिजले ६ खेलमा पराजय बेहोरेको थियो भने एक खेल वर्षाका कारण रद्द हुँदा अंक बाँड्न बाध्य बनेको थियो । दोस्रो पटक विश्वकपमा सहभागिता जनाएको अफगानिस्तानले भने नौ वटै खेलमा पराजय बेहोर्यो ।
लिड्सस्थित हेडिङ्लीमा वेस्ट इन्डिजले दिएको ३१२ रनको विशाल लक्ष्य पछ्याएको अफगानिस्तानले ५० ओभरमा अलआउट हुँदै २८८ रन मात्र बनाउन सक्यो । अफगानिस्तानका इक्रम अली खिल र रमात साहले अर्धशतकीय पाली खेले । कप्तान गुलबद्दिन नइब पाँच रनमा पेभेलियन फर्किएपछि क्रिज समाल्न मैदान छिरेका खिलले आक्रामक ब्याटिङ गर्दै ९३ बलमा आठ चौकाको मद्दतमा ८६ रन बनाए । यसैगरी रमात साहले ७८ बलमा १० चौकाबाट ६२ रन बनाए । यस्तै अस्घर अफघानले ४०, नाजिबुल्लाह जाडरनले ३१ र सैयद सिर्जादले २५ रन बनाए ।
वेस्ट इन्डिजका कार्लोस बेथवेटले चार विकेट लिए । यसैगरी केमार रोचले तीन तथा क्रिस गेल र ओसाने थोमसले एक÷एक विकेट हात पारे । यसअघि टस जितेर पहिले ब्याटिङ गरेको वेस्ट इन्डिजले निर्धारित ५० ओभरमा ६ विकेट गुमाएर ३११ रनको योगफल खडा गरेको थियो । वेस्ट इन्डिजका लागि इभिन लेविस, साई होप र निकोलस पुरनले अर्धशतकीय पाली खेले।
प्रारम्भिक ब्याट्सम्यान लेविसले ७८ बलमा दुई छक्का र ६ चौकाको मद्दतमा ५८ रन बनाए । यसैगरी साई होपले ९२ बलमा दुई छक्का र ६ चौकाबाट ७७ तथा आक्रामक ब्याटिङ गरेका पुरनले ४३ बलमा एक छक्का र ६ चौकाबाट ५८ रन बनाए । यसैगरी कप्तान जासन होल्डरले ४५, सिमरन हेटमायरले ३९, कार्लोस बेथवेटले १४ र प्रारम्भिक ब्याट्सम्यान क्रिस गेलले सात रन बनाए ।
अफगानिस्तानका दौलत जाडरनले दुई विकेट लिए । यसैगरी सैयद सिर्जाद, मोहम्मद नाबी र रासिद खानले एक÷एक विकेट हात पारे ।