काठमाडौं : प्रज्ञा-प्रतिष्ठानका सदस्य सचिव प्रा. जगतप्रसाद उपाध्यायले भानुभक्तीय रामायणले जीवन जिउने कला सिकाएको बताएका छन्। रामायणले नेपाली समाजमा गहिरो प्रभाव पारेको बताउँदै उनले भाषा-साहित्यको जग बसाल्न समेत उल्लेख्य सहयोग पु¥याएको बताए।
नेपाल प्रज्ञा-प्रतिष्ठान, संस्कृति विभाग तथा बालसाहित्य र लोकवार्ता विभाग एवं भानु प्रतिष्ठानद्वारा संयुक्त रूपमा आदिकवि भानुभक्त आचार्यको २०६औं जन्मजयन्तीका अवसरमा राजधानीमा बुधबार आयोजित विचार गोष्ठीमा सदस्य सचिव उपाध्यायले यस्तो बताएका हुन्।
उनले भने, ‘मानिसलाई सत्कर्ममा लाग्न र जीवन जिउने कला पनि रामायणले नै सिकाएको छ। यसकारण भानुभक्तको चिन्तनलाई हाम्रो चरित्रमा उतार्नु नै भानु जयन्तीको मूल सन्देश हो।’
प्रतिष्ठानका उपकुलपति डा. जगमान गुरुङले आदिकवि भानुभक्तमा सत्गुणी र लोकको उपकार गर्ने विशेषता भएका कारण रामायणलाई नेपाली भाषामा अनुवाद गर्न सफल भएको बताए। उनले भने, ‘रामायण र अन्य कृतिका माध्यमबाट भानुभक्त विश्वसामू चिनिन सफल हुनुभयो। निष्ठा र निःस्वार्थ भावका साथ कर्म गर्ने मानिस एक न एक दिन सफल भएरै छाड्छ।’
प्रज्ञा-प्रतिष्ठानका बालसाहित्य र लोकवार्ता विभागका प्रमुख डा. देवी नेपालले नेपाली समाजका विभिन्न समुदाय र संस्कृतिमा भानुभक्तीय रामायणको अत्यन्त गहिरो प्रभाव रहेको बताए। उनले भानुभक्तीय रामायणका माध्यमबाट विश्वमा नेपाली संस्कृति र सम्पन्नताको प्रचार गर्न सकिनेमा जोड दिए।
भानु प्रतिष्ठानका अध्यक्ष प्रा.डा. व्रतराज आचार्यले प्रतिष्ठानले भानुभक्त र भानुभक्तीय रामायणलाई केन्द्रमा राखेर नेपाली भाषा र साहित्यको विकासका लागि काम गरिरहेको जानकारी दिए। डा. तुलसीप्रसाद भट्टराईले ‘भानुभक्तीय रचनाको सामाजिक पक्ष’ र डा. भक्त राईले ‘नेपाली लोकजीवनमा रामायण संस्कृति’ विषयक कार्यपत्र प्रस्तुत गरे।
प्रतिक्रिया दिनुहोस !
