विराटनगर : मोरङको धनपालथान गाउँपालिका–४ को आनन्द इँटा भट्टा नजिक बुधबार बस दुर्घटना हुँदा आठजना घाइते भएका छन् ।
विराटनगरबाट रंगेलीतर्फ जाँदै गरेको को १ ख ३०१५ नम्बरको बस दिउँसो ३ बजे दुर्घटना भएको हो । दुर्घटनामा मोरङको सुनवर्षी नगरपालिका–८ का ३५ वर्षीय मोहम्मद सवरिया, ३० वर्षीया चन्दी खातुन, छोरा ४ वर्षीय मोहम्मद इब्राहिम, रतुवामाई नगरपालिका–७ की ६० वर्षीया अनुदेवी सुतिहार, ७० वर्षीया अवलाल सुतिहार, कानेपोखरी गाउँपालिका–१ का ६३ वर्षीय अशोक थापा, पाँचथर घर भएका २३ वर्षीय टिंकु रिजाल र १५ वर्षीय आदित्य रेग्मी घाइते छन् ।
जिल्ला ट्राफिक प्रहरी कार्यालय मोरङका प्रमुख शिवकुमार पोखरेलका अनुसार गम्भीर घाइतेको गोल्डेन अस्पताल विराटनगरमा उपचार भइरहेको छ । अन्य घाइतेको कोसी अस्पतालमा उपचार भइराखेको छ ।
रंगेली जाँदै गरेको बस विपरित दिशाबाट आउँदै गरेको ट्याक्टरलाई साइड दिने क्रममा खेतमा पल्टिएको प्रहरीको भनाइ छ । दुर्घटनापछि फरार रहेका चालक रंगेली–२ का ३५ वर्षीय केशव खरेलको खोजी भइरहेको पोखरेलले बताए ।
प्रतिक्रिया दिनुहोस !
