काठमाडौं : नेकपाका वरिष्ठ नेता एवं पूर्वप्रधानमन्त्री माधवकुमार नेपालले दुवै छिमेकको चासो बुझेर राष्ट्र हितमा केन्द्रित भई गहन सहकार्य गर्न आवश्यक रहेको बताएका छन् । घनिष्ठ सम्बन्धमा उतारचढाव आउने भए पनि मित्रता पनि उत्तिकै रहने भन्दै उदाउँदा दुई छिमेकीबाट अधिकतम लाभ लिन सक्नुपर्ने उनले बताए । उनले भने, ‘नेपालले सबै क्षेत्रमा लाभ लिन सक्नुपर्छ । भारत मात्र होइन चीनसँग पनि उत्तिकै लाभ लिनुपर्छ । यसका लागि हामीले गृहकार्य गर्न आवश्यक छ।’
हरेक राष्ट्रका आ–आफ्नै चासो र विकास मोडल हुने भएकाले नेपाल त्यसमा सचेत रहनुपर्ने उनले बताए । उनले भारतसँग सदियौंदेखिको निकटताबाट नेपालले अधिकतम फाइदा अझै लिन नसकेको भन्दै यसमा ध्यान दिनुपर्ने बताए । नेपाल–भारत खुला सीमामा सुरक्षालगायत विषयको चासोमा दुवै देश उत्तिकै सतर्क हुनुपर्ने उनको धारणा छ । बिहीबार पुष्पलाल स्मृति प्रतिष्ठानले ललितपुरमा गरेको नेपाल–भारत सम्बन्धका आयामबारे प्रवचनमा उनले यस्तो धारणा राखेका हुन् ।
परराष्ट्रमन्त्री प्रदीप ज्ञवालीले देशको समृद्धिका लागि भारतसँग सहकार्यमा जोड दिएर सरकार अघि बढेको बताए । ‘हामीले सुरक्षा र अन्य अवान्छित गतिविधिमा ध्यान दिएर सहकार्य अझै मजबुत र अन्तरक्रियात्मक बनाएका छौं’, उनले भने, ‘नेपाल–भारतबीच अन्तरसीमा अपराध र अवाञ्छित घटना रोक्न दुवै देशबाट भएका प्रयास सराहनीय छन् ।’ त्यस्ता गतिविधिले सहकार्य बिथोल्ने भएकाले सचेत रहेर अघि बढ्न आवश्यक भएको उनले बताए ।
‘हामी कुनै पनि छिमेकी विरुद्ध प्रयोग हुँदैनौं । यसमा नेपाल सचेत छ । त्यस्ता गतिविधिका लागि कसैले पनि आफ्नो देशको भूभाग प्रयोग गर्न दिनु हुन्न’, ज्ञवालीले भने, ‘दुवैै देशको सम्बन्धका राम्रो पक्ष भनेको एकले अर्कोका संवेदनशीलता बुझ्ने नै हो । पछिल्लो समयको राजनीतिक भेटघाट र अन्तरक्रियाबाट यो प्रष्ट छ ।’
नेपालका लागि भारतीय राजदूत मञ्जिवसिंह पुरीले दुईपक्षीय सम्बन्धबारे पावर पोइन्ट प्रस्तुती गरेका थिए । उनले नेपाल–भारतको सम्बन्ध सुदृढ र निखारिएको बताए । उनले यो सानातिना विवाद र उतारचढावले हल्लिने सम्बन्ध नभएकाले विकासमा सहकार्य गर्दै अघि बढ्नुपर्ने बताए । उनले ९ महिनायता नेपालबाट भारततर्फ करिब ३२ प्रतिशत निर्यात वृद्धि भएको र अझै बढाउनुपर्ने बताए । नेपाल–भारत सहकार्य बढ्दै गएको उनले बताए ।
राजदूत पुरीले नेपालको विकासमा भारतले लामो समय देखि गर्दै आएको सहकार्य स्मरण गराउँदै रेल जयनगर–जनकपुर मात्र नभएर रक्सौल–काठमाडौंको परिकल्पना अघि बढिसकेको स्पष्ट पारे ।
नेपालका सबै ठाउँ हवाईमार्गले जोडिएको र अन्तर्राष्ट्रिय सञ्जालमा जोडिन पनि हवाईमार्ग नै उपयोगी हुने राजदूत पुरीले बताए । व्यापार, पारवहन, लगानी, पर्यटन, संस्कृति, शिक्षा, विकाससहितका क्षेत्रमा भारतीय सहकार्य अघि बढेको समेत उनले सुनाए । नेपालको समृद्धिमा भारत र त्यहाँका व्यापारी जस्तोसुकै सहयोग गर्न पनि तयार रहेको स्पष्ट पारे ।
प्रतिक्रिया दिनुहोस !
