काठमाडौं : राजपा अध्यक्ष मण्डलको संयोजकमा राजकिशोर यादव चयन भएका छन् । जनकपुरमा बसेको अध्यक्ष मण्डलको बैठकले यादवलाई संयोजक चयन गरेको हो ।
दुई महिनामा अध्यक्ष मण्डलका संयोजक फेरिने चक्रिय प्रणालीअनुसार यादव संयोजक भएको महासचिव केशव झाले जानकारी दिए । २०७४ वैशाखमा मधेस केन्द्रित ६ दल एकता भएर बनेको राजपामा ६ जनाको अध्यक्ष मण्डल छ ।
एकताताका महन्थ ठाकुर संयोजक थिए । उनले गत मंसिरसम्म संयोजक भएर पार्टी चलाए । प्रत्येक दुई महिनामा अध्यक्ष मण्डलको संयोजक परिवर्तन गर्ने विधानमै व्यवस्था गरेको राजपाले मंसिरमा राजेन्द्र महतोलाई संयोजक बनाएपछि दुई दुई महिनामा परिवर्तन गर्दै आएको छ ।
यादवले जिम्मेवारी पाएसँगै संयोजक हुने ६ जना अध्यक्षको नै पालो पुगेको छ । अब दुई महिनामा पुनः ठाकुरले जिम्मेवारी पाउने महासचिव झाले बताए । ‘कार्तिक अन्तिम साता महाधिवेशनको मिति तय गरेका छौँ’, उनले भने, ‘त्यसबेलासम्म उहाँ (ठाकुर)लाई नै संयोजक बनाउने कि के गर्ने भन्ने छलफल गर्नै बाँकी छ ।’
प्रतिक्रिया दिनुहोस !
