काठमाडौं : चिनियाँ जनकांग्रेसको वातावरण तथा स्रोत संरक्षण समितिका अध्यक्ष काओ हुछङ नेतृत्वको उच्चस्तरीय प्रतिनिधिमण्डलले वन तथा वातावरणमन्त्री शक्तिबहादुर बस्नेतसँग भेटघाट गरेको छ।नेपाल भ्रमणमा रहेका चिनियाँ टोलिले बुधबार मन्त्री बस्नेतसहित नेपाली पदाधिकारीसँग भेटघाट गरेको हो।
भेटका क्रममा टोली नेता हुछङले आफूहरु संरक्षणक्षेत्र र राष्ट्रिय पार्कसम्बन्धी नयाँ कानुनको मस्यौदा ड्राफ्ट गर्ने प्रक्रियामा रहेको र त्यसैका लागि अनुभवबारे बुझ्न नेपाल आएको बताए। 'वन, वातावरण, वन्यजन्तु संरक्षण र पर्यायवरणको क्षेत्रमा नेपालले राम्रो काम गरेको छ, 'हुछेङले भने, 'हामी तपाईंहरुको अनुभवबाट सिक्न आएका हौं, हाम्रो देशमा कानुन बनाउँदा तपाईंहरुले गरिरहेको अभ्यासलाई समेट्ने योजनामा छौं।'
चीन नेपालभन्दा भूगोलका आधारमा ठूलो भए पनि दुई देशबीच सदैव समानता, सह-अस्तित्व र भातृत्वमा आधारित सम्बन्ध रहेको चर्चा गर्दै उनले वातावरण संरक्षण र जलवायु परिवर्तनका क्षेत्रमा समेत नयाँ सहकार्यको जरुरी देखिएको औंल्याए।
उनले चिनियाँ कम्युनिस्ट पार्टीको १८ औं महाधिवेशनमा राष्ट्रपति सी जिनफिङले पर्यायवरण विचारधारा प्रस्ताव गरेको र त्यसले चीनमा मात्र नभइ संसारभरी कसरी पर्यावरणीय सन्तुलन कायम राख्ने भन्ने दिशानिर्देश गरेको उल्लेख गरे।
मन्त्री बस्नेतले नेपालको वन तथा वातावरण, संरक्षण क्षेत्र, निकुञ्ज र आरक्षका छुट्टाछुट्टै कानुनी व्यवस्था र नियमावलीका व्यवस्थाबारे चिनियाँ टोलीलाई अवगत गराए।
उनले राष्ट्रिय निकुञ्जबाट भएको आम्दानीको ५० प्रतिशत हिस्सा मध्यवर्ती क्षेत्रमा बसोबास गर्ने स्थानीयका लागि खर्च भएको जानकारी दिँदै त्यसले संरक्षणमा स्थानीयको सहभागिता र स्वामित्व सुनिश्चित गरेको बताए।
मन्त्री बस्नेतले पृथ्वीको सुरक्षा र प्राणी जगतको हित विश्वकै दायित्व भएकाले त्यसमा नेपाल-चीन सहकार्य जरुरी रहेको बताए। उनले राजनीति, कूटनीति, अर्थनीति तथा पर्यावरणलाई एकाकार गर्नुपर्नेमा जोड दिए।
नेपाल 'समृद्ध नेपाल, सुखी नेपाली' नाराका साथ विकासको अभियानमा जुटेको भन्दै मन्त्री बस्नेतले त्यसमा सहयोग गर्न चीनसँग आग्रह गरे। 'हामी समृद्ध नेपाल, सुखी नेपाली अभियानमा छौं,' बस्नेतले भने, 'यसमा राष्ट्रिय सीमाभन्दा बाहिरको सहयोग र सहकार्य जरुरी छ, हामी चीनसँग सहकार्य गर्न चाहन्छौं।'
मन्त्री बस्नेतले हरित ग्याँस उत्सर्जनमा नेपालको भूमिका नगण्य अर्थात ०.०२७ प्रतिशत रहेको भए पनि त्यसबाट अतिप्रभावितको सूचीमा रहनु दुःखद विषय भएको उल्लेख गरे। संघीय संसदका महासचिव मनोहरप्रसाद भट्टराईको निमन्त्रणामा नेपाल आएको चिनियाँ जनकंग्रेस टोलीले यसअघि सभामुख कृणबहादुर महरासँग शिष्टाचार भेट गरेको थियो।
प्रतिक्रिया दिनुहोस !
