वीरगन्ज : नेपालबाट भारतमा गाँजा लैजाँदै गरेको अवस्थामा प्रहरीले चार जना भारतीयलाई पक्राउ गरेको छ । वीरगन्ज महानगरपालिका–२५ ड्राइपोर्ट बहुअरीबाट प्रहरीले ८९ केजी गाँजा र भारतीय नम्बर प्लेटको बोलेरो गाडीसहित चार जना भारतीयलाई पक्राउ गरेको हो ।
पक्राउ पर्नेमा बिहारको मोतिहारी जिल्लाको बिशुनपुर–३ घर भएका ३१ वर्षीय नुर महमद हुसेन, मोतिहारीकै फुलवरिया–११ का ३२ वर्षीय असलम आलम साईन, फुलवरियाकै २८ वर्षीय ईर्शाद साइन र मोतिहारी सितलपटीका ३० वर्षीय सुनिल साह रहेका छन् ।
गोप्य सूचनाका आधारमा जिल्ला प्रहरी कार्यालय पर्साबाट खटिएको प्रहरी टोलीले मङगलबार बिहान बहुअरी स्थित सडकमा चेकजाँच गरेको थियो । चेकजाँचका क्रममा बीआर २८ जी २७७० नम्बरको बोलेरो गाडीको तल फल्स बटम बनाई लुकाई राखेको अवस्थामा गाँजा फेला पारेको हो । ५० वटा पोकामा रहेको ८९ केजी गाँजा बरामद भएको पर्साका प्रहरी उपरीक्षक सोमेन्द्र सिंह राठौरले जानकारी दिए ।
मकवानपुरको मनहरीबाट गाँजा खरिद गरी वीरगन्ज हुँदै भारत लैजान लागेको अवस्थामा पक्राउ गरिएको प्रहरीको भनाई छ । पक्राउ परेका चारै जनालाई जिल्ला प्रहरी कार्यालय पर्सामा राखेर थप अनुसन्धान भइरहेको प्रहरी उपरीक्षक राठौरले जानकारी दिए ।
प्रतिक्रिया दिनुहोस !
