परम्परागत बुद्ध विहारमा यसरी विवाह गरे पश्चिमा सेलिब्रिटी जोडीले

लण्डन : अधिकांश जोडी विवाह गर्न भौँतारिने भेन्यु भव्य होटल वा ‘पार्टी प्यालेस’ नै होला ।

तर बेलायती गायिकाले यस्तो ठाउँमा विवाह गरिन्, जुन ठाउँबारे नै समाचार बन्यो । अहिले पश्चिमा मिडिया उनै लियोना लेविसले विवाहको लागि छनोट गरेको ‘भेन्यु’बारे चर्चा गर्दै छन् ।

खासमा लेविस र उनका प्रेमी डेनिस जचको विवाह एक बुद्ध विहारमा सम्पन्न भयो । गत जुलाइ २७ मा उनीहरु विवाहका लागि किन पूर्वीय धार्मिक तथा सांस्कृतिक आस्थाको केन्द्रमै पुगे त ? यसबारे मिडियामा चर्चा भएको छ ।

यससँगै उनीहरुको विवाह समारोहका लागि काटिएको ‘वेडिङ केक’ पनि ‘भेजिटेरियन’ नै थियो । साथमा धेरैथरी फलफूल । बेलायतमै ८६५ एकर क्षेत्रफलमा फैलिएको उक्त विहार १६औं शताब्दिको रहेको अन्तर्राष्ट्रिय मिडिया बताउँछन् ।

पृष्ठभुमिमा मन्त्रमुग्ध संगीत । साथमा सेतो पहिरनमा सजिएको यो जोडीको विवाह यस्तो परम्परागत स्थलमा गरिएकै कारण पनि चर्चा भएको हो । नवविवाहित यो जोडीले भने पहिलेदेखि नै कतै घरजस्तै शान्त महसुश गर्न सकिने ठाउँमा विवाह गर्न चाहेको प्रतिक्रिया दिएको छ ।

लियोना र डेनिस २०१० मा पहिलो पटक भेटेका थिए । ३१ वर्षे डेनिस बियोन्से, केली र पिटबुलसँग समेत काम गरिसकेका जर्मन कोरियोग्राफर हुन् । ३४ वर्षीया लियोना बेलायती गायिका हुन् । बेलायतकै पुरानो उक्त विहारमा विवाह गरेपछि उनीहरुले तस्बिर सार्वजनिक गरेका थिए ।