इमेज च्यानलबाट प्रसारण हुने टेलिसिरियल ‘उल्टो सुल्टो’ मा ‘प्रेमनाथ’ को भूमिका निर्वाह गरिरहेको छु । यसअघि पनि टेलिशृंखलामा काम गरेको छु । टेलिसिरियलमा अभिनय गर्नुअघि थिएटरमा काम गर्थें । सानैदेखि कलाकार बन्ने रुचि थियो । त्यसैले अभिनय क्षेत्रमा आइयो ।
प्रेमनाथ रिटायर्ड जीवन बिताइरहेको बूढो र अशक्त मान्छे हो । जसको दाहिने हात चल्दैन, बोली सुकेको छ । रवि डंगोलबाट प्रेमनाथ बन्न ४० मिनेटजति समय लाग्छ । मेकअप र ड्रेसअपमा बढी समय लाग्छ । सबैभन्दा बढी ध्यान चाहिँ हातमा दिनुपर्छ । पहिला त काम गर्न निकै गाह्रो हुन्थ्यो । कहिले के नमिल्ने, कहिले के ! अहिले चाहिँ त्यस्तौ छैन । काम गर्दा सहज महसुस गर्छु ।
सुकेको स्वर प्रेमनाथको विशेषता हो । त्यस्तै दाहिने हात पनि चल्न हुँदैन । तर, अभिनय गर्दा कहिलेकाहीँ बिर्सिन्छु । कुन बेला कुन हात चल्छ, पत्तै हुँदैन । त्यसकारण कहिलेकाहीँ धेरै टेक खानुपर्छ । प्रेमनाथ बनिसकेपछि मेरो बोली नै फरक हुन्छ । स्वरमा बढी मेहनत गर्नुपर्छ । स्वर फेरिँदा लामो–लामो डायलग बोल्न गाह्रो हुने गर्छ ।
‘उल्टो सुल्टो’ अघि ‘तीतो सत्य’ टेलिसिरियलमा काम गरेको थिएँ । त्यसमा ‘सुकु बेइमान’ को भूमिकामा थिएँ । दर्शकले मलाई अहिल पनि त्यही नामले चिन्नुहुन्छ । बाटोमा भेट्यो भने ‘सुकु बेइमान’ भन्नुहुन्छ ।
प्रस्तुतिः आशक्ति फुयाल
प्रतिक्रिया दिनुहोस !
