काठमाडौं : प्रधानमन्त्री केपी शर्मा ओली सिंगापुरबाट स्वास्थ्य परीक्षण सकेर आगामी आइतबार स्वदेश फर्किने भएका छन्। प्रधानमन्त्रीको निजी सचिवालयका अनुसार प्रधानमन्त्री ओली आइतबार दिउँसो थाइ एयरवेजबाट स्वदेश फर्कदै छन्।
प्रधानमन्त्री ओली साउन १८ गते नियमित स्वास्थ्य परीक्षणका लागि सिंगापुर प्रस्थान गरेका हुन्। सिंगापुरको सरकारी अस्पताललाई न्युयोर्कमा रहेका ख्यातीप्राप्त निजी एवं सरकारी अस्पतालसँग तुलना गरिन्छ। यसअघि उनले आफ्नो उपचार दिल्ली, थाइल्याण्ड र सिंगापुराम गराउँदै आएका थिए।
१२ वर्षअघि मिर्गौला प्रत्यारोपण गरेका ओलीले आफ्नो स्वास्थ्य परीक्षणलाई उत्तिकै महत्व दिँदै आएका छन्। उनको दिल्लीस्थित अपोलो अस्पतालमा मिर्गौला प्रत्यारोपण गरेपछि नियमित स्वास्थ्य परीक्षण काठमाडौं, दिल्ली, बैंकक र सिंगापुरमा हुँदै आएको थियो।
अधिकांश समय थाइल्याण्ड जाने गरेका प्रधानमन्त्री यसपटक सिंगापुर गएका हुन्। प्रधानमन्त्रीसँग धर्मपत्नी राधिका शाक्य, प्रमुख राजनीतिक सल्लाहकार विष्णु रिमाल, निजी चिकित्सक डा. दिव्यसिंह शाह छन्।
प्रतिक्रिया दिनुहोस !
