काठमाडौं : निजी क्षेत्रको वायुसेवा कम्पनी श्री एयरलाइन्सलाई संस्कृति, पर्यटन तथा नागरिक उड्डयान मन्त्रालयले नियमित उडान (सेड्यूल फ्लाइट) को अनुमति दिएको छ । मंगलबारको पर्यटनमन्त्रीस्तरीय निर्णयबाट श्री एयरलाइन्सलाई भारतका चार र बंगलादेशको एक गन्तव्यमा नियमित उडान गर्ने गरी अनुमति दिएको हो ।
मन्त्रालयले बुधबार श्री एयरलाइन्सलाई एक पत्रमार्फत फिक्स विंग्स (स्थिर पंखाजडित) जहाजमार्फत नियमित अन्तर्राष्ट्रिय उडानको इजाजत पत्र (लाइसेन्स) दिने निर्णय भएको जानकारी दिएको छ । श्रीलाई मन्त्रालयले भारतको कोलकाता, दिल्ली, अहमदाबाद र बैग्लोरमा तथा बंगलादेशको ढाकामा नियमित उडान गर्ने गरी यस्तो अनुमति दिएको हो । अब श्रीले उडान अनुमतिका लागि सरकारले तोकेको राजश्व तिरेर अनुमतिको प्रमाणपत्र लिन सक्ने पर्यटन मन्त्रालयअन्तर्गतको हवाई उड्डयान महाशाखाले जानकारी दिएको छ ।
महाशाखाका अनुसार अन्तर्राष्ट्रिय उडानका निम्ति प्रतिसेक्टर पाँच लाख रुपैयाँ राजश्व बुझाउनुपर्छ । यो शुल्क बुझाएपछि मन्त्रालयले इजाजत पत्र दिनेछ । यो वायुसेवालाई मन्त्रालयले गतवर्ष चार्टर उडानको अनुमति दिएको थियो । सोही अनुमतिलाई स्तरोन्नती गरेर नियमित उडानको इजाजत पत्र दिएको मन्त्रालयले जानकारी दिएको छ । श्रीले २०६७ सालदेखि हेलिकोप्टरबाट चार्टर उडानको अनुमति पाएको वायुसेवा कम्पनी हो । यसले आन्तरिक उडानमा नियमित हेली तथा फिक्स विंग्स र अन्तर्राष्ट्रियमा चार्टर उडान पनि दिइरहेको छ । यो वायुसेवालाई सरकारले नियमित उडानको अनुमति दिए पनि अब अन्तर्राष्ट्रिय उडानमा नयाँ कम्पनी थप हुने भएको हो ।
श्रीले आवश्यक प्रक्रिया पूरा गरेर सम्बन्धित क्षेत्रका विमानस्थलबाट अनुमति पाएपछि नियमित उडान गर्नेछ । श्रीका कर्पोरेट प्रबन्धक अनिल मानन्धरका अनुसार यसअघि चार्टर उडानको अनुमति पाएको भए पनि नियमित उडानको पनि अनुमति माग गरिएको थियो । यो अनुमतिपछि अब सम्बन्धित देशबाट अनुमति लिएर उडान गरिनेछ । यो वायुसेवाको नियमित उडानको लागि २÷३ महिना समय लाग्ने बुझाई मानन्धरको छ । उनका अनुसार पाँचवटै गन्तव्यमा उडानका लागि आवश्यक प्रक्रिया पुर्याएर अनुमति माग गरिने छ ।
उताबाट अनुमति पाएपछि नियमित उडान गर्ने उनको भनाइ छ । श्रीले आन्तरिक उडान गरिरहेकै जहाजबाट अन्तर्राष्ट्रिय उडानको अनुमति मागेको हो । यो वायुसेवासँग सीआरजे २०० र ७०० नामका चारवटा जहाज छन् । ५० र ७० सिट क्षमताका दुई, दुईवटा जहाज छ । दुवै प्रकृतिको जहाजबाट अन्तर्राष्ट्रिय उडान अनुमति श्रीले पाएको छ । यो वायुसेवाले आगामी शनिबार क्यू ४०० नामको ७८ सिट क्षमताको नयाँ जहाज ल्याउने छ । यस्तो जहाज दुईवटा आउने र सो जहाजलाई पनि अन्तर्राष्ट्रिय उडानमै प्रयोग गर्ने योजना श्रीको छ ।
श्रीले हाल नेपाल नागरिक उड्डयन प्राधिकरणबाट चार्टर उडानको अनुमति माग गरेको छ । यसका लागि भारतको वनारसमा परीक्षण उडान पनि सम्पन्न गरिसकेको छ । ‘प्राधिकरणले श्रीको प्रमाण पत्र परीक्षण गरिरहेको छ । यो वायुसेवाले चार्टरको अनुमति पाउने तयारीमा रहेको भए पनि मन्त्रालयले नियमित उडानको अनुमति दिएकाले अब दुवै प्रकारको अनुमति दिन सकिन्छ ।’ प्राधिकरणअन्तर्गतको हवाई उड्डयान सुरक्षा विभाग प्रमुख राजु श्रेष्ठले भने । उनका अनुसार नियमित र चार्टर उडान दुवैको प्रक्रिया उस्तै भएकाले अनुमतिमा कुनै फरक पर्दैन ।
श्रीले भारतका चारवटा गन्तव्यमा अनुमति पाएकाले यसको प्राथमिकता पनि भारतीय पर्यटकीय बजारमा नै हुने भएको छ । भारतका चारवटै सहरलाई गन्तव्य बनाएर दिइने नियमित अन्तर्राष्ट्रिय उडानले बजारमा प्रतिस्पर्धा पनि बढ्ने भएको छ । विगत दुई दशकदेखि हेलिकोप्टर उडानमा अब्बल रहेको यो कम्पनीले हेलिकोप्टरको अन्तर्राष्ट्रिय उडानको अभ्यासलाई नै नियमित वायुसेवामा विस्तार गर्न खोजेको हो । २०७४ भदौदेखि नियमित आन्तरिक उडान गरिरहेको यो वायुसेवा कम्पनीले अब भने अन्तर्राष्ट्रियमा पनि सेवा दिने भएको छ । हाल नेपालबाट नियमित अन्तर्राष्ट्रिय उडान गर्ने वायुसेवामा नेपाल वायुसेवा निगम, हिमालय एयरलाइन्स र बुद्ध एयर हुन् ।
श्रीले सन् २०१८ मा चार लाख ४७ हजार ८ सय ७७ यात्रुलाई सेवा दिएको छ । आन्तरिक उडानमा कुल यात्रु सेवामध्ये श्रीको हिस्सा १५.७२ प्रतिशतसहित तेस्रो स्थानमा छ । यो वायुसेवाले हाल चारवटा आन्तरिक उडानका जहाजमार्फत माउन्टेन फ्लाइटसहित काठमाडौंबाट भैरहवा, विराटनगर, भद्रपुर, नेपालगन्ज, धनगढी र राजविराजमा नियमित उडान गरिरहेको छ ।
प्रतिक्रिया दिनुहोस !
