गुल्मी : राज्य पुनरसंरचनामा गइसकेपछि संघीयता सफलतापूर्वक कार्यान्वयन भएको परराष्ट्रमन्त्री प्रदीपकुमार ज्ञवालीले बताएका छन् । जिल्लाको सत्यवती गाउँपालिकामा गएको पहिरोका कारण विस्थापित पहिरोपिडीतलाई राहात लिएर तेश्रो पटक गृह जिल्ला आएका ज्ञवालीले यस्तो बताएका हुन् ।
मन्त्री ज्ञवालीले सरकारको पहिलो वर्ष संघीयता कार्यान्वयन र नीति निर्माणमा लागेकोले विकास र सम्वृद्धि आगामी वर्षमा तीव्र गतिमा अगाडि बढ्ने बताए । पत्रकार महासंघ गुल्मीले आयोजना गरेको पत्रकार सम्मेलनमा बोल्दै उनले अन्य देशको तुलनामा एक वर्षमै कर्मचारी समायोजनको काम सकिएको उल्लेख गरे । पहिलो एकवर्षमै श्रोतहरुको पुँजी बाँडफाँड गरिएको समेत उनले बताए । वैदेशिक रोजगारीमा जाने कामदारको संख्या यस वर्ष झण्डै ३७ प्रतिशतले घटेको मन्त्री ज्ञवालीले जानकारी दिए । कामदारको संख्या घटे पनि रेमिट्यान्स भने झण्डै २८ प्रतिशतले बढेको उनले बताए । जनताले सुम्पिएको जिम्मेवारी पूरा गर्न सरकार निरन्तर लागिपरेको बताए ।
नेकपाको पार्टी एकीकरणमा धेरै आशंका भए पनि हिजोमात्रै केन्द्रीय सचिवालयको बैठकले सबै विभागीय जिम्मेवारी टुँगो लगाइसकेको बताए । उनले असोजदेखि पार्टी सुदृढीकरण र जागरण अभियान देशव्यापीरुपमा सञ्चालन गरिने समेत बताए ।
जिम्मेवारी नपाएर अलमल परिरहेका कार्यकर्तालाई अभियानमार्फत सम्बोधन गरिने उल्लेख गरे । मन्त्री ज्ञवालीले स्थानीय तहले गरेका काम आमनागरिकसमक्ष पुर्याउने र नागरिकका सुझाव लिने कार्य अभियानमा गरिने बताए । विकास र सम्वृद्धिका लागि राज्यका तिनवटै सरकार एकतावद्ध भएर अगाडि बढ्नुपर्ने ज्ञवालीको भनाइ छ । अबको बाटो र लक्ष्य भनेको विकास र सम्वृद्धि भएकाले सबूले हातेमालो गरेर काम गर्नुपर्ने उल्लेख गरे ।
प्रतिक्रिया दिनुहोस !
