नेपाल वायुसेवाको जापान उडान भदौ १२ बाट नियमित
काठमडौं : राष्ट्रिय ध्वजाबाहक नेपाल वायुसेवा निगमले यही भदौ १२ गते (अगस्ट २९)देखि जापानको ओसाका उडान गर्ने तयारी पूरा भएको जानकारी दिएको छ । निगमले मंगलबार पत्रकार सम्मेलन आयोजना गरेरै जापानको ओसाका उडानको तयारी पूरा भएको बताएको छ ।
तोकिएको समय र मितिमा उडान गर्ने र भदौ १२ मा हुने पहिलो उडानपछिका हरेक साताको लागि तोकिएको तीन वटा उडानमा नाफारघाटा नहेरिने निगमका कार्यकारी अध्यक्ष मदन खरेलले बताए । उनले भने ‘ओसाका उडान हुन्छ हुँदैन भनेर अझै सोधपुछ आइरहेको छ । निगमले तयारी पूरा गरिसकेको र अब नियमति उडान हुनेमा कुनै शंका उपशंका बाँकी छैन ।’ हरेक साताको मंगलबार, बिहीबार र शनिबार काठमाडौं–ओसाका–काठमाडौं नियमित उडान हुने र तालिकामा कुनै हेरफेर नहुने जानकारी पनि खरेलले दिए ।
यसअघि असार १९ गते देखि नै गर्ने भनिएको उडान तयारी नपुगेकै कारण भदौ १२ लाई सारिएको हो । निगले जापानमा सेवा सुरुसँगै एक महिनास यो गन्तव्यको दुईतर्फी उडानमा प्रवद्र्धनात्मक भाडादर जम्मा ७२ रुपैयाँमा नै दुईतर्फी उडान गर्ने भएको छ ।
निगमले एयरवसको ए ३३०–२०० नामक २७४ सिट क्षमताको वाइडबडीबाट नियमित उडान गर्ने छ । यस्तो उडानका लागि एक सय ५० जनासम्मको बुकिङ आएको छ । नयाँ गन्तव्य भएको र उडानको सुरुवाती समय भएकोले ५० प्रतिशत मात्रै सिट क्षमता भरिएको छ । अझै एक साताको समय बाँकी भएकोले सिट क्षमता बढ्न पनि सक्छ । जति सिट क्षमता भएपनि उडान भने नरोकिने जानकारी खरेलले दिए । अहिले दुई तीन महिनामा नै नाफामा गइहाल्छौ भन्ने छैन् । कम्तिमा एक वर्षमा ८० प्रतिशतको उडान भराइदर कायम गराउने योजना भने निगमले बताएको खरेल बताउँछन् ।
खरेलले भने ‘ओसाका मात्रै हैन्, आगामी पुस १६ ९१ जनावरी २०२०० देखि जापानकै अर्को गन्तव्य टेकियोको नारिता विमानस्थलमा पनि उडान गर्ने तयारी भइरहेको छ । यसका लागि निगमले आवश्यक विवरण बुझाएको छ । नारिताको निम्ति अनुमतिको अन्तिम तयारी भइरहेको जानकारी पनि खरेलले दिए ।
‘निगमले सन् १९९४ को अक्टोबर ३० बाट सुरु गरेको जापान उडान त्यतिबेला काठमाडौं–सांघाई–ओसाका थियो’, निगमका वाणिज्य विभागका निर्देशक टंकनिधि दाहालले भने । उनका अनुसार सन् २००७ को अप्रिल १२ सम्म भएको उत्त जापान उडानमा निगमले आफ्नो शाखः राम्रो बनाएको थियो । निगमले जति समय जापान उडान गर्यो त्यतिबेलासम्म नियमित उडान रद्द नगर्ने वायुसेवाको रूपमा अवार्ड नै पायो । अब फेरि सोही अनुसारको विश्वास हुने गरी उडान गर्ने जानकारी दाहालले दिए ।
निगमले जापान उडान प्राविधिक रूपमा पनि तयारी पूरा गरेको निगमका उडान सञ्चालन विभाग निर्देशक दिपु जुहार्चनले बताए । उनका अनुसार आवश्यक जनशक्ति तयारी रहेको वाइडबडीको उडानका लागि पाइलट पनि तयारी अवस्थामा राखिएको छ । हाल २५ जना पाइलटमध्ये १५ जना नेपाली र १० जना विदेशीलाई निगमले बाइडबडीको उडानमा प्रयोग गरिरहेको जानकारी पनि चुहार्चनले दिए ।