विश्वभर आज : बोको हरामको हमलादेखि जापान-कोरिया तनाव
![विश्वभर आज : बोको हरामको हमलादेखि जापान-कोरिया तनाव](https://annapurnapost.prixacdn.net/media/albums/world-newsss_20190825140027_pPP6g6fGuF.jpg)
काठमाडाैं : हङकङ, फ्रान्स, जापान, काेरिया लगायत केही मुलुक आज विश्व समाचार बनेका छन् । फ्रान्समा 'जी सेभेन' सम्मेलन जारी छ । हङकङमा प्रदर्शन हुँदा काेरिया र जापान थप विवादमा फसेका छन् । यता बंगलादेशमा राेहिंग्या शरणार्थी समुदायले विशाल प्रदर्शन निकाले । यस लगायत केही घटनाले आज पनि विश्वकाे ध्यान तानेका छन् । केही प्रमुख विश्वघटना यहाँ प्रस्तुत गरिएकाे छ :
बंगलादेशमा २ लाख रोहिंग्या सडकमा उत्रिए
ढाका : बंगलादेशमा रोहिंग्या समुदायले आफ्नो विस्थापनको दोस्रो वार्षिकी मनाउँदैछ । आइतबार २ लाखजति मानिस सडकमा ओर्लिएर म्यानमार जान पाउनुपर्ने भन्दै प्रदर्शन गरे । बंगलादेशको कक्स बजारस्थित कुतुपालोङ क्याम्पबाट उनीहरुले शान्तिपूर्ण रुपमा आन्दोलन निकालेका हुन् । बालबालिका, महिला समेत उल्लेख्य मात्रामा सहभागी भएको उक्त प्रदर्शनमा ‘भगवान महान छन्, रोहिंग्या जिन्दावाद !’ जस्ता नारा लगाइएका थिए ।
बोको हरामको हमलामा १२ जना मारिए
नाइजर : नाइजेरियामा बोको हरामले हमला गरेको भनिएको आक्रमणमा १२ जना सर्वसाधारण मारिएका छन् । नाइजरस्थित गएराति हमला भएको थियो । सीमाक्षेत्र गेस्केरोस्थित हमला हुँदा १२ गाउँलेको ज्यान गएको अधिकारीले जनाएका छन् ।
रातिको उक्त घटना यहाँको विद्रोही भूमिगत समूह बोको हरामले गराएको अधिकारीले जनाएका छन् । गत मार्चमा मात्रै दुई आक्रमणमा आठजना सर्वसाधारण र सात प्रहरी मारिएका थिए । बोको हरामले नाइजेरियामा हतियार उठाएपछि अहिलेसम्म ३० हजार मानिस मारिएका छन् भने दुई लाख विस्थापित भएका छन् । उनीहरु नाइजेरिया आसपासका क्षेत्र, क्यामरुन र छडमा पनि सक्रिय छन् ।
हङकङमा प्रदर्शनकारीलाई पानी फोहोरा प्रहार
हङकङ : हङकङमा ‘प्रो डेमोक्रेसी’ प्रदर्शनकर्ताहरुको आन्दोलनमा यहाँको प्रहरीले पानी फोहोरा आक्रमण गरेको छ । सिंगो सहर नै प्रदर्शनकारीले भरिएको अवस्थामा प्रहरीले भीड नियन्त्रणमा लिन पहिलो पटक पानी फोहोरा आक्रमण गरेको हो ।
दुई महिनादेखि चलेको आन्दोलनका बीच आइतबार पनि हजारौँको संख्यामा प्रदर्शनकारी सडकमा आएका थिए । प्रहरीले अश्रुग्यास प्रहार गर्नुका साथै पक्राउ गरिरहँदा पनि आन्दोलनकारीको संख्या घटेको छैन । प्रहरीले भने प्रदर्शनकारीलाई उनीहरुले इँटा, ढुंगा प्रहार गरिरहेको आरोप लगाएको छ । यस्तैमा प्रदर्शनकारीले बाँस तथा काठ प्रयोग गर्दै सडक अवरोध गर्दैआएका छन् ।
फ्रान्समा ‘जी सेभेन’सम्मेलन सुरु
पेरिस : बलियो अर्थतन्त्र भएका सात मुलुकको गठबन्धन ‘जी सेभेन’को सम्मेलन फ्रान्समा सुरु भएको छ । यसका लागि सातै देशका प्रमुख फ्रान्समा भेला भएका छन् ।
वार्षिक रुपमा हुने सम्मेलन यस वर्ष फ्रान्समा भएको हो । यससँगै ‘जी सेभेन’ गठबन्धनबाट असन्तुष्टहरुले प्रदर्शन पनि गरिरहेका छन् । हेन्डे सहरमा उनीहरुले तीनदिने सम्मेलनको विरोध गरेका हुन् । सम्मेलन चीन र अमेरिकाबीचको व्यापारयुद्ध, यूरोपियन यूनियनबाट बेलायतको बहिर्गमन, अमेरिका र इरानबीचको तनाब, एमाजोन जंगलमा लागेको डढेलो लगायत मुद्दामा सम्मेलन केन्द्रित हुने बताइएको छ ।
जापान र दक्षिण कोरियाबीच फेरि विवाद
टोक्यो : दक्षिण कोरियाली सेनाले विवादित टापु आसपास सैन्य अभ्यास गरेको भन्दै जापानले विरोध जनाएको छ । जापान र दक्षिण कोरियाले लामो समयदेखि विवादित क्षेत्र ताकेसिमालाई लिएर आआफ्नो राष्ट्रिय स्वाभिमानको मुद्दा बनाउँदैआएका छन् ।
दक्षिण कोरियाले यही आइतबार सैन्य अभ्यास गरेपछि विवाद झन् चर्किएको हो । जापानी विदेश मन्त्रालयले विज्ञप्ति जारी गर्दै दक्षिण कोरियाको उक्त कार्य अस्वीकार्य भएको जनाएको छ । साथै जापानले उक्त आइल्याण्डलाई आफ्नै भूभागमा पर्ने कुरा दोहोर्याएको छ ।
सुडानमा बाढीले ६० को मृत्यु
सुडान : सुडानमा भारी वर्षा र बाढीका कारण ६० जनाको मृत्यु भएको छ । यहाँको स्वास्थ्य मन्त्रालयका अनुसार अरु १ सय भन्दा धेरै घाइते भएका छन् । स्वास्थ्य मन्त्रालयले विज्ञप्ति जारी गर्दै यस्तो जानकारी गराएको हो । अन्तर्राष्ट्रिय मिडियाका अनुसार बाढीबाट २० हजार भन्दा धेरै घर पूर्ण रुपमा क्षतिग्रस्त छन् । यस्तै ३२ हजार भन्दा धेरै घर आंशिक रुपमा क्षतिग्रस्त छन् ।
अमेरिकाले प्रतिबन्ध फुकाउनुपर्ने बेलायती प्रधानमन्त्रीको शर्त
पेरिस : बेलायती प्रधानमन्त्री बोरिस जोन्सनले अमेरिकासँगको व्यापारमा धेरै अवरोध रहेको बताएका छन् । फ्रान्समा जारी ‘जी सेभेन’ सम्मेलनमा पुगेका जोन्सनले यस्तो बताएका हुन् ।
अमेरिकाले यदी आफूहरुसँग व्यापार सम्झौता गर्ने हो भने अमेरिकाले व्यापार युद्धमा लगाएका प्रतिबन्ध फुकुवा गर्नुपर्ने उनको शर्त छ । जोन्सनले सम्मेलनमा सहभागी नेताहरुलाई भेट्नुअघि बिहान अमेरिकी राष्ट्रपति डोनल्ड ट्रम्पसँग भेटवार्ता गरेका थिए । जोन्सनले ब्रेक्जिट मामिलाबारे विभिन्न देशका नेता तथा युरोपेली संघ परिषद्का अध्यक्ष डोनल्ड टस्कसँग पनि भेट्दैछन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)