काठमाडौं : नेकपा अध्यक्ष पुष्पकमल दाहाल ‘प्रचण्ड’ले विवादित विधेयकबारे पार्टी नेतासँग छलफल गरेका छन्। बुधबार निजी निवास खुमलटारमा प्रचण्डले पार्टीका शीर्ष नेतासँग छलफल गरेका हुन्।
छलफलका लागि प्रचण्ड निवासमा नेकपा महासचिव विष्णु पौडेल, प्रवक्ता नारायणकाजी श्रेष्ठ, नेता वामदेव गौतम, सुवास नेम्वाङलगायत नेता सहभागी थिए। छलफलमा सहभागी नेता नेम्वाङले पार्टी नेताबीच औपचारिक र अनौपचारिक छलफल भएको जानकारी दिए। ‘हामी पार्टी अध्यक्षसँग दैनिक छफल गरिराखेका हुन्छौँ’, नेम्वाङले भने, ‘आज औपचारिक र अनौपचारिक दुवै छलफल भयो। विशेषत नागरिकता, टीआरसीलगायत विधेयकमा छलफल भएको छ।’
नेतासँग प्रचण्डले नेपाल नागरिकता विधेयक, भूमी सम्बन्धी विधेयक (आठौं संशोधन) र सत्य निरुपण सम्बन्धी विधेयकका विषयमा छलफल गरेका हुन्।
नागरिकता विधेयकमा बुहारीलाई नागरिकता दिने विषय विवादित छ। संसद्को राज्य व्यवस्था तथा सुशासन समितिले बनाएको उपसमितिलेसमेत विवाद समाधान गर्न सकेको छैन। मंगलबार उपसमितिले विवादित विषयको टुंगो नलाग्दै समितिमा प्रतिवेदन बुझाएको छ। त्यसैगरी सत्य निरुपण आयोग सम्बन्धी विधेयकमा आममाफीलगायत विषय विवादित छन्।
नागरिकता विधेयककका विवादित केही बुँदामा सहमति जुटे पनि दुई बुँदामा सहमति जुट्न सकेको छैन। उपसमितिले मुख्य विवादका रूपमा रहेको अंगीकृत नागरिकताको विषय टुंगो नलगाई प्रतिवेदन बुझाएको हो। नेपालका विवाह गरेर आउने विदेशी महिलालाई कति समयमा अंगीकृत नागरिकता दिने भन्ने विषय उपसमितिले पनि टुंगो लगाउन नसकेको हो।
प्रतिक्रिया दिनुहोस !
