विश्वभर आज : विश्वयुद्धबारे जर्मनीको माफीदेखि अमेरिकामा आँधीको त्रास
![विश्वभर आज : विश्वयुद्धबारे जर्मनीको माफीदेखि अमेरिकामा आँधीको त्रास](https://annapurnapost.prixacdn.net/media/albums/internactional-news_20190901135056_cSmCruegSr.jpg)
काठमाडौँ : १९३९ सेप्टेम्बर १ कै दिन जर्मनीले पोल्याण्डमाथि बम हमला गरेको थियो । जुन घटना दोस्रो विश्वयुद्धको निम्तो थियो । त्यस घटनाको आज ८० वर्ष पुगेको छ । वर्तमान विश्व राजनीतिमा पनि प्रभावशाली मुलुकबीच आर्थिक मामिलालाई लिएर बेला बेला तनाव उत्पन्न हुँदैआएको छ । यसबाहेक पनि केही प्राकृतिक विपद् आज विश्व समाचार बनेका छन् । पढौँ आजका प्रमुख विश्व समाचार :
विश्वयुद्धको ८० वर्षपछि जर्मन राष्ट्रपतिले माफी मागे
पोल्याण्ड : जर्मनीका राष्ट्रपति फ्र्यांक वाल्टर स्टेइनमेरले दोस्रो विश्वयुद्ध सुरु भएको ८० वर्षपछि पोल्याण्डसँग माफी मागेका छन् । पोल्याण्डको वेलन सहरमा भएको एक सभामा उनले युद्ध पीडितहरुसमक्ष माफी माग्दै युद्धमा बाच्नेहरुप्रति धन्य भएको बताए ।
जर्मनीको नाजी सरकारले १ सेप्टेम्बर, १९३९ मा यही सहरमा पहिलो पटक बम हमला गरेको थियो । सोही आक्रमणको स्मृतिको रुपमा गरिएको सभामा जर्मन राष्ट्रपतिले त्यस घटनाप्रति दुख व्यक्त गरेका हुन् । दोस्रो विश्वयुद्धका बेला यहाँ ६० लाख मानिस मारिएका थिए । जसलाई इतिहासकै कुरुप लडाइँको रुपमा व्याख्या गरिन्छ । पोल्याण्डका राष्ट्रपति अन्द्रेज दुवाले भने स्वतन्त्रताको लागि लडाइँ गर्ने र वलिदानी दिने सिपाहीहरुलाई धन्यवाद दिएका थिए ।
बहमासमा भयानक आँधीको भय, अमेरिकामा पनि असर
वासिङ्टन : बहमासमा डोरियन हावाको कडा गतिबाट आउने खतरनाक आँधीको चेतावनी दिइएको छ । अमेरिकामा आँधी सम्बन्धी सूचना दिने निकाय ‘नेशनल हुरिकेन सेन्टर’ले यसबारे सचेत गराएको छ । आँधीले आइतबार बहमासमा हान्ने बताइएको छ । सोही आँधीको असर अमेरिकाको पूर्वी समुद्री किनार क्षेत्रमा पनि पर्नेछ ।
आँधीको जोखिमसँगै बहमासका बासिन्दाहरु नियमित काम नै छाडेर अन्यत्र सुरक्षित स्थानतर्फ जाने तयारी गरिरहेको बिबिसीले उल्लेख गरेको छ । यस्तै त्यस क्षेत्रमा अन्तर्राष्ट्रिय बाहेक अन्य विमानस्थल बन्द गरिएको छ । यसपटकको आँधीलाई १९९२ को ‘५औं क्याटेगोरी’को आँधीपछिकै ठूलो आँधीको रुपमा मौसमविद्हरुले जनाएका छन् ।
भारतको अर्थव्यवस्था अति चिन्ताजनक : पूर्व प्रधानमन्त्री सिंह
नयाँदिल्ली : भारतीय पूर्व प्रधानमन्त्री मनमोहन सिंहले भारतीय अर्थव्यवस्थाको अवस्था अति चिन्ताजनक रहेको बताएका छन् । मनमोहन सिंहले नरेन्द्र मोदी सरकारका कारण अर्थव्यवस्थामा मन्दी आएको टिप्पणी गरेका हुन् ।
सरकारले दुई दिनअघि नै तथ्यांक जारी गरिको थियो । जहाँ अर्थव्यवस्थाको वृद्धिदर पछिल्लो ६ वर्षमा सबैभन्दा न्युन रहेको बताइएको छ । डा. मनमोहन सिंहको एक अर्थशास्त्रीको रुपमा पनि पहिचान छ । बिबिसी हिन्दीका अनुसार यसरी लगातार गिरावट आउनु भारतको लागि अति जटिल अवस्था हुने उनले बताएका छन् । ‘लगातार गिरावट जारी रह्यो भने भारतका लागि अति जटिल अवस्था हुनेछ । म आग्रह गर्छु कि सरकार प्रतिशोधको राजनीतिबाट बाहिर आओस् । अर्थव्यवस्थाको यस्तो हालत सरकारको गल्तीहरुबाटै बनेको हो ।’
अमेरिकामा अन्धाधुन्ध गोली प्रहारबाट ५ मारिए, २० घाइते
वासिङ्टन : अमेरिकाको टेक्ससस्थित एक बन्दुकधारीले अन्धाधुन्ध गोली प्रहार गर्दा ५ जना मारिएका छन् । प्रहरी कारवाहीमा ती हतियारधारी व्यक्तिको पनि मृत्यु भएको छ । २० जना घाइते छन् । घाइतेमध्ये तीनजना कानुन व्यवसायी छन् ।
ती व्यक्तिले हुलाक सेवाको एउटा गाडी अपहरणमा लिइ अन्धाधुन्ध गोली प्रहार गरेका थिए । ओडेसा प्रहरी प्रमुख माइकेल गर्कका अनुसार घटनाबारे अनुसन्धान भइरहेको छ । घटनाका अभियुक्त ३० वर्षीय पुरुष भएको पनि बताइएको छ । टेक्ससमै एक महिनाअघि पनि यस्तै प्रकृतिको घटना भएको थियो । जहाँ २२ को ज्यान गएको थियो ।
अमेरिकासँग वार्ताको पहल भइरहँदा अफगानिस्तानमा तालिबानी हमला
बगदाद : उत्तरी अफगानिस्तानको बगलान प्रान्तमा तालिबानी समूहले हमला गरेको छ । अमेरिकासँग वार्ताको पहल भइरहँदा तालिबानी लडाकुले अचानक यस्तो हमला गरेका हुन् । पछिल्लो समय अफगानिस्तानमा चल्दैआएको १८ वर्षे युद्ध अन्त्यको पहल भइरहेको थियो ।
हमलाको प्रारम्भीक समाचार अनुसार अहिलेसम्म कोही पनि मारिएको वा घाइते भएको खबर सार्वजनिक भएको छैन । सरकारी सेनासँग लडाइँ भएको भोलिपल्टै तालिबानी लडाकुले यहाँ हमला गरेको अन्तर्राष्ट्रिय मिडियाले जनाएका छन् । यसअघि अफगानिस्तानको गृह मन्त्रालयले कुन्दुजबाट तालिबानी हटाइएको भनेको केही घण्टामै आक्रमण भएको हो ।
इजरायललाई हिजबुल्लाहको चेतावनी
तेहरान : इजरायलले ड्रोन आक्रमणको परिणाम भोग्न तयार हुनुपर्ने भन्दै हिजबुल्लाहका नेता हसन नसरल्लाहले चेतावनी दिएका छन् । साथै हिजबुल्लाहका कमान्डरहरु प्रतिवादका लागि तयार रहेको पनि उनले बताए ।
एक टेलिभिजन अन्तर्वार्ताको क्रममा उनले यस्तो चेतावनी दिएका हुन् । लेबनन र इजरायलबीच तनाब बढिरहँदा नसरल्लाहले आफ्ना समर्थकलाई सम्बोधन गर्दै ‘बदला लिन’ तयार रहेको बताए । गत आइतबार हिजबुल्लाहले इजरायललाई ड्रोन आक्रमण गरेको आरोप लगाएको थियो ।
हङकङ प्रदर्शनमा हवाइ फायर, पाँचजना गम्भीर घाइते
हङकङ : हङकङमा आन्दोलनरत युवा प्रदर्शनकारीहरुले आइतबार पनि प्रहरीको प्रतिबन्द तोड्दै सडकमा ओर्लिए । यस क्रममा प्रहरीले थुप्रै रबरका गोली, पेट्रोल बम, पानीको फोहोरा र हवाइ फायरिङ समेत गरेको थियो ।
प्रहरी र प्रदर्शनकारीको झडपका साथै धरपकड समेत भएको छ । यस क्रममा थुप्रै प्रदर्शनकारी घाइते भइ अस्पतालमा छन् । तीमध्ये पाँचजनाको अवस्था गम्भीर रहेको बताइएको छ । हङकङमा तीन महिनादेखि आन्दोलन जारी छ । जहाँ चीनले समेत पटक पटक प्रदर्शनकारीलाई धम्की दिँदैआएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)