बागलुङ : पोखराका पत्रकार ओम हमाललाई सर्वोच्च अदालतको आदेश विपरित पुनः पक्राउ गरिएको विरोधमा संविधान उपहार पठाइएको छ।
नेपाल पत्रकार महासंघ बागलुङ शाखाले बुधबार प्रमुख जिल्ला अधिकारी लुकबहादुर क्षेत्रीमार्फत सांकेतिक विरोध स्वरुप नेपालको संविधान र ज्ञापनपत्र उपहार पठाएको हो।
प्रहरीको गैर कानुनी पक्राउ आतंक बन्द गरी कानुनी राज्य, सर्वोच्च अदालतको आदेशको सम्मान गर्न तथा मानव अधिकारको रक्षार्थ सांकेतिक विरोध स्वरुप संविधान उपहार पठाइएको पत्रकार महासंघ बागलुङ शाखाका सचिव राम थापाले बताए।
लामो समयदेखि भ्रष्टाचार, अन्याय, अत्याचार र बेथितिका विरुद्द निरन्तर कलम चलाउदै आएका पत्रकार हमालको निशर्त रिहाइको महासंघले माग गरेको छ।
मूलधारको पत्रकारिता गरिरहेको व्यक्तिलाई विचार र आस्थाकै आधारमा पक्राउ गर्नु अभिव्यक्ति स्वतन्त्रता र मौलिक हक प्रयोगविरुद्धको ज्यादती भएकाले विरोध गर्नु परेको सचिव थापाले बताए।
प्रतिक्रिया दिनुहोस !
