काठमाडौं : एसीसी यू-१९ एसिया कप क्रिकेट प्रतियोगिताको पहिलो खेलमा नेपालले श्रीलंकालाई १६० रनको चुनौती दिएको छ। नेपालले ४२ ओभरमा ९ विकेट गुमाएर १५९ रन जोडेको हो। पानी परेपछि ४२ ओभरमा छोट्याइएको खेलमा नेपालले टस जितेर पहिले ब्याटिङ गरेको थियो।
नेपालका लागि ओपनर रित गौतमले सर्वाधिक ५४ रनको योगदान गरे। उनले ८५ बलमा ४ चौका हिर्काए। ओपनर पवन सर्राफ ४ रनमा आउट हुँदा तेस्रो नम्बरमा आएका आसिफ शेख पनि ७ रनमै आउट भए।
त्यसपछि आएका कप्तान रोहित पौडेल र रित गौतमले नेपालको इनिङ सम्हाले। रोहित अर्धशतक बनाउन ३ रनले चुके। उनी आशियन डानिएलको बलमा क्याच आउट भए। त्यसपछिका ब्याट्स्म्यान भने क्रिजमा टिक्न सकेनन्। आशा गरिएका खेलाडी हरिबहादुर चौहान १२ रन बनाउँदा रनआउट हुन पुगे। रशिद खान १५ रनमा नटआउट रहे।
नेपालका लागि कुशल मल्ल र कमलसिंह ऐरीले २-२ रनको योगदान गरे। अन्य खेलाडी भने मात्र खाता खोलेर आउट भए। श्रीलंका लागि दिल्शन मदुशंका र नाभोद परनाभिथनाले ३-३ विकेट लिए। त्यस्तै रोहन सन्जय र आशियन डानिएलले १-१ विकेट लिए।
प्रतिक्रिया दिनुहोस !
