वीरगञ्ज : तेजाब प्रहारबाट घाइते भएकी युवतीलाई थप उपचारको लागि हस्पिटलले काठमाडौँ पठाएको छ । वीरगञ्जको नारायणी अस्पतालमा उपचाररत वीरगञ्ज–३ छपकैया निवासी मुस्कान खातुनको स्वास्थ्य अवस्था बिग्रिँदै गएपछि थप उपचारका लागि एम्बुलेन्सबाट काठमाडौँको कीर्तिपुर अस्पतालमा पठाइएको हो ।
वीरगञ्जको गणेशमानचौकमा बिहीबार बिहान १५ वर्षीया खातुनलाई एसिड प्रहार गरिएको थियो । खातुनमाथि एसिड प्रहार गरेको अभियोगमा छपकैया–२ निवासी संसाद मियाँलाई प्रहरीले पक्रिएको छ ।
विद्यालय जाने क्रममा वीरगञ्ज ३ छपकैया निवासी मुस्कान खातुनमाथि दुई युवकले तेजाब प्रहार गरेका हुन् । तेजाब प्रहारबाट घाइते भएकी खातुनलाई वीरगञ्जको नारायणी अस्पताल लगिएको थियो । तेजाबबाट खातुनको अनुहार, छाती, हातखुट्टालगायतका शरीरको भाग जलेको उपचारमा संलग्न चिकित्सकले बताएका छन् । खातुनको स्वास्थ्य अवस्था गम्भीर रहेको पनि चिकित्सकले बताएका छन् ।
बिहान ६ बजे विद्यालय जान लागेकी मुस्कानलाई सम्सादले तेजाब खन्याएको प्रत्यक्षदर्शी र पीडितले बताएका छन् । उनीहरुकै बयानका आधारमा संसादलाई पक्राउ गरिएको जिल्ला प्रहरी कार्यालय पर्साका सूचना अधिकृत प्रहरी नायब उपरीक्षक अनन्तराम शर्माले जानकारी दिए ।
युवतीमाथि तेजाब खन्याउने कार्यमा सहयोग गर्ने वीरगञ्ज–२ छपकैया निवासी मजिद आलमको खोजी भइरहेको उनले बताए । मुस्कान वीरगञ्जको रामटोलमा अवस्थित त्रिभुवन हनुमान माध्यमिक विद्यलायको कक्षा १० मा पढ्छिन्।
संसादले प्रेम प्रसङ्गको कारण आफूले तेजाब प्रहार गरेको बयानमा स्वीकार गरेको प्रहरीले जनाएको छ । जिल्ला प्रहरी कार्यालय पर्साका प्रहरी नायब उपरीक्षक शर्माका अनुसार मजिद आलमले मुस्कानलाई प्रेम गरेको र उनको प्रेमलाई मुस्कानले स्वीकार नगरेको कारण एसिड छ्यापेको संसादले बयानमा बताएका छन् ।
प्रतिक्रिया दिनुहोस !
