विश्वभर आज : भारतीय युवा अभियन्ताविरुद्ध देशद्रोहीको मुद्दादेखि अमेरिकामा आँधी

जिम्बावेका पूर्व राष्ट्रपति रोबर्ट मुगाबेको निधन

हरारे : जिम्बावेका पूर्व राष्ट्रपति रोबर्ट मुगाबेको ९५ वर्षको उमेरमा निधन भएको छ । राष्ट्रपति एम्मेर्सन मांगाग्वाले शुक्रबार यस्तो खबर सार्वजनिक गरेका हुन् । उनले दुखद् समाचार भन्दै ट्वीटरमार्फत समेत सार्वजनिक गरेका छन् ।

जिम्मावेमा मुगाबेलाई जिम्माबेको स्वतन्त्रताको प्रतिक समेत मानिन्छ । केही महिनादेखि बिरामी परेका उनलाई सिंगापुरमा उपचारका लागि राखिएको थियो । स्थानीय मिडियाले भने उनलाई प्रोस्टेट क्यान्सर भएको जनाएका थिए । मुगाबेलाई २०१७ नोभेम्बरमा आम प्रदर्शनसँगै यहाँको सैनिकले अपदस्थ गरेको थियो ।

बेलायती प्रधानमन्त्रीका आफ्नै भाइले दिए राजीनामा

लण्डन : बेलायती प्रधानमन्त्री बोरिस जोन्सनका आफ्नै भाइ जो जोन्सनले अचानक पदबाट राजीनामा दिने घोषणा गरेका छन् । उनले परिवारप्रतिको वफादारी र राष्ट्रिय हितलाई सँगै व्यवस्थापन गर्न कठिन भएपछि यस्तो निर्णय गरेको जनाएका छन् ।

यस्तो समस्यालाई उनले ‘समाधान हुनै नसक्ने तनाब’भन्दै सोही कारण राजीनामा दिन लागेको बताएका छन् । पछिल्लो समय प्रधानमन्त्री बोरिस र उनका भाइ जो महत्वपूर्ण राष्ट्रिय राजनीतिका मुद्दा समर्थन गर्ने सवालमा दुई कित्तामा उभिन थालेका थिए ।

बोरिसका भाइ जोले अचानक आपूर्ति मन्त्रीको पद र सांसदको पदबाटै राजीनामा दिएका हुन् । अन्तर्राष्ट्रिय मिडियाका अनुसार जोन्सनको राजीनामा संसदमा ‘कन्जर्भेटिभ’ पार्टीका लागि ठूलो नोक्सान भएको टिप्पणी गरेका छन् । साथै उनको राजीनामाले अरु धेरै मन्त्री र सांसदलाई पनि नैतिक संकट उत्पन्न गर्नसक्ने आंकलन गरिएको छ । लामो समय पत्रकारिता क्षेत्रमा सक्रिय रहेका उनी शिक्षा तथा पत्रकारिता क्षेत्रका विज्ञ पनि मानिन्छन् ।

चन्द्रमामा भारतले पठाएको यान आज राति अवतरण हुँदैछ यसरी

नयाँदिल्ली : भारतले पठाएको चन्द्रयान–२ चन्द्रमाको दक्षिणी ध्रुवमा आज शुक्रबार राति अवतरणको तयारीमा छ । शुक्रबार राति अर्थात् शनिबार बिहान साढे १ बजेदेखि साढे २ बजेसम्मको अवधिमा चन्द्रयान अवतरण हुने बताइएको छ ।

साथै चन्द्रमाको एक दिनको अवधिमा केही प्रयोग पनि गरिनेछ । त्यहाँ पठाइएका रकेटको गति अवतरणका बेला कम हुँदै केही बेर हावामै तैरिनेछन् । यसअघि अमेरिका, चीन र रुसले आफ्ना यान चन्द्रमामा पठाइसकेका छन् । वैज्ञानिकहरुले भने चन्द्रमाको धुलो चन्द्रयान अवतरणका लागि चुनौती हुनसक्ने बताएका छन् ।

‘ल्याण्डर’लाई धुलोले छोपेर अवतरणमा बाधा पुर्याउनसक्ने उनीहरुको चिन्ता छ । यसका लागि अवतरणको अवधिभर चार प्रक्षेपक स्वतः बन्द हुनेछन् र एउटा मात्रै चालू रहनेछ । जसले गर्दा धुलो उड्ने क्रम रोक्ने वैज्ञानिकको हवाला दिँदै भारतीय मिडियाले जनाएका छन् ।

चन्द्रमामा ‘सफ्ट ल्याण्डिङ’को अहिलेसम्म ३८ वटा प्रयास भएका थिए । तर ५२ प्रतिशत मात्रै सफल भएका छन् । चन्द्रमा छुने पहिलो प्रयास अमेरिका र सोभियत संघ रुसले गरेका थिए । अहिलेसम्म चन्द्रमामा संसारभरबाट ६ देश तथा एजेन्सीले स्याटलाइट यान पठाएका छन् । भारतले ३८७७ केजी तौलको चन्द्रयान–२ गत जुलाइ २२ मा लन्च गरेको थियो । उक्त यानले पृथ्वीलाई २३ दिनसम्म चक्कर लगाएर चन्द्रमाको कक्षमा पुग्न ६ दिन लगाएको थियो ।

भियतनामी अधिकारकर्मी थाइल्याण्डबाट सम्पर्क विहीन

ब्यांकक : भियतनामका एकजना अधिकारकर्मी अभियन्ता थाइल्याण्डबाट हराएको आशंका गरिएको छ । शुक्रबार उनको तत्काल खोजीको माग गर्न थालिएको छ । दुई साताअघि उनलाई ब्यांकक देखिएको बताइन्छ ।

लोकतन्त्रवादी अभियन्ता ओड सायावोङ थाइल्याण्डबाट सम्पर्क विहीन भएपछि अनुसन्धानको माग गरिएको हो । थाइल्याण्डमै बस्दैआएका ओडले भियतनाममा उप्रवासी कामदारहरुको अधिकारको क्षेत्रमा आवाज उठाउँदैआएका थिए । लाओसमा २०१६ देखि पाँचजना थाइ अभियन्ता हराइरहेका छन् ।

शक्तिशाली डोरियन आँधी अमेरिकामा पनि

वासिङ्टन : बहमासमा वितण्डा मच्चाएको डोरियन आँधी अब अमेरिका पुगेको छ । शक्तिशाली समुद्री आँधीले अमेरिकाको दक्षिण पूर्वी क्षेत्रमा असर पुर्याउन थालेको बताइएको छ ।

जसका कारण अमेरिकाका केही भूभागमा ठूलो वर्षा भएको बिबिसीले उल्लेख गरेको छ । मौसमविद्हरुका अनुसार अमेरिकाको अरु केही भागमा ठूलो आँधी आउनेछ । प्रारम्भिक अवस्थामा भन्दा आँधीको बहाव केही कम देखिएको छ । डोरियनमा भने ‘ठूलो संकट’ भन्दै संकटकाल नै घोषणा गरिएको थियो ।

भारतीय अभियन्ता शेहेलाविरुद्ध देशद्रोहको मुद्दा

नयाँदिल्ली : भारतीय युवा अभियन्ता शेहेला रसिदविरुद्ध देशद्रोहको मुद्दा दायर भएको छ । उनले केही साताअघि मात्रै कश्मीरमा भारतीय सेनाले स्थानीयका घरभित्र छिरेर युवालाई पक्राउ गरेको भन्दै ट्वीट गरेकी थिइन् ।

उनले सेनाको आलोचना गर्दै ट्वीट गरेपछि नै उनीविरुद्ध देशद्रोहको मुद्दा दायर भएको हो । रसिदमाथि देशभित्र हिंसा भड्काउने उद्देश्यले गलत प्रचारवाजी गरेको पनि आरोप छ ।

जवाहरलाल नेहरु विश्वविद्यालयमा विद्यार्थी राजनीति गर्दा अघिल्लो वर्ष उनकै साथी कन्हैया कुमारविरुद्ध पनि सरकारले मुद्दा दायर गरेको थियो । तर कन्हैयालाई अदालतले निर्दोष सावित गरिदियो ।

हाउठीको मिसाइल हमला

रियाद : हाउठी मिलिसियाले यमनबाट ब्यालेस्टिक मिसाइल प्रक्षेपण गरेको बताइएको छ । यमनको हार्फ सुफ्यान जिल्लाबाट शुक्रबार दिउसो प्रक्षेपण गरेको हो ।
अरब गठबन्धनका अनुसार उसले निरन्तर अन्तर्राष्ट्रिय कानुन उल्लंघन गर्दैआएको छ । साथै उक्त मिसाइल आवासीय क्षेत्रमा अवतरण गरिएको टिप्पणी गठबन्धनको छ । साथै निर्दोष यमनी नागरिकको जीवनमाथि नै खतरा भएको उसले जनाएको छ ।