न्युयोर्क : स्पेनका चर्चित खेलाडी राफेल नाडाल ग्रान्डस्लाम टेनिस ‘यूएस ओपन’को फाइनलमा पुगेका छन् । ३३ वर्षीय अनुभवी खेलाडी नाडालले शनिबार बिहान भएको सेमिफाइनलमा इटालियन खेलाडी माटियो बेरेट्टिनीलाई ३–० को सोझो सेटमा हराए । दोस्रो वरीयताका नाडालले २४औं वरीयताका माटियोमाथि ७–६ (८–६), ६–४, ६–१ को नतिजा निकालेका थिए । नाडाल पाँचांै पटक यूएस ओपन टेनिसको फाइनलमा प्रवेश गरेका हुन् ।
पहिलो सेटमा निकै मेहनत गर्नु परे पनि नाडालले त्यसपछिको सेटमा सहज जित निकालेका थिए । १८ पटककोे ग्रान्डस्लाम विजेता नाडालले फाइनलमा पाँचौं वरीयताका रुसी खेलाडी ड्यानिल मेदभेदेभसँग प्रतिस्पर्धा गर्नेछन् । खेलपछि नाडालले पहिलो सेटमा आफ्नै कमजोरीका साथ जित निकाल्न धेरै गाह्रो भएको बताए । नाडालले मेदभेदेभसँगको फाइनल खेल रोमाञ्चक र प्रतिस्पर्धात्मक हुने पनि बताए ।
नाडाल १८ पटकका ग्रान्डस्लाम च्याम्पियन हुन् । नाडालले हालसम्म १२ पटक फ्रेन्च ओपन, तीन पटक यूएस ओपन, दुई पटक विम्बल्डन र एक पटक अस्ट्रेलियन ओपनको उपाधि जितिसकेका छन् । नाडालले पछिल्लो पटक सन् २०१७ मा यूएस ओपनको उपाधि चुमेका थिए । उनले पछिल्लो पटक जितेको ग्रान्डस्लाम उपाधि भने फ्रेन्च ओपन हो । नाडालले यसै वर्ष फ्रेन्च ओपनको उपाधि हात पारेका थिए ।
मेदभेदेभले बुल्गेरियाका ७८औं वरीयताका ग्रिगर दिमित्रोभलाई ७–६, ६–४, ६–३ को सोझो सेटमा हराउँदै फाइनलमा स्थान बनाएका थिए । २३ वर्षीय मेदभेदेभ पहिलो पटक ग्रान्डस्लाम टेनिसको फाइनलमा पुगेका हुन् । उनले क्वार्टरफाइनलमा स्विट्जरल्यान्डका स्टान वावरिन्कालाई पराजित गरेका थिए । । मेदभेदेभ ग्रान्डस्लाम टेनिस फाइनलमा पुगेको पहिलो पटक हो ।
महिलातर्फको फाइनलमा भने अमेरिकी स्टार सेरेना विलियम्स र क्यानडाकी बियान्का एन्डे«स्कुबीच प्रतिस्पर्धा हुनेछ ।
प्रतिक्रिया दिनुहोस !
