जोमसोम : प्रशिक्षक चन्द्र आलेसहितको टोलीले मुस्ताङमा र्याफ्टिङको सफल परीक्षण गरेको छ। मध्यमुस्ताङ क्षेत्रको कालिगण्डकी नदीमा आइतबार र सोमबार र्याफ्टिङको परीक्षण तथा प्राविधिक अध्ययन भएको हो।
परीक्षणको जिम्मा इनिसिएटिभ आउटडोर प्रालिले लिएको थियो। र्याफ्टिङमा उक्त कम्पनीका ७ जना गाइड खटिएका थिए। आइतबार विहान र दिउँसो गरी २ पटक र्याफ्टिङ प्रशिक्षण गरिएको थियो। सुरुआती चरणमा चन्द्र आले र उनका गाइडहरुले कालिगण्डकीमा र्याफ्टिङको प्रारम्भीक परीक्षण गरेका हुन्।
परीक्षण टोलीले करिब २५ किलोमिटर दुरी २ घण्टा ३० मिनेटमा पुरा गरे। परीक्षणको दोश्रो र तेश्रो चरणमा स्थानीय जनप्रतिनिधि, कर्मचारी र स्थानीयहरुले र्याफ्टिङ गरे।
सरकारले घोषणा गरेको आसन्न भिजिट नेपाल २०२० को प्रर्वद्धन तथा कालिगण्डकी नदीमा र्याफ्टिङ सम्भाव्यता पहिचान गरी नयाँ पर्यटकीय गन्तब्यको विकास गर्न वारागुङ र घरपझोङ गाउँपालिकाले र्याफ्टिङको संयुक्त पहल गरेका छन्।
मुस्ताङको वारागुङ मुक्तिक्षेत्र छुसाङ गेट देखि घरपझोङ गाउँपालिकाको जोमसोम पक्की पुलसम्म र्याफ्टिङ भएको हो। समून्द्री सतहदेखि करिब ३ हजार मिटर उचाईको हिमालीक्षेत्रमा भएको र्याफ्टिङले पर्यटकलाई उत्साही तुल्याउने वारागुङ मुक्तिक्षेत्र गाउँपालिकाका अध्यक्ष फेञ्चोक छेप्तेन गुरुङले दाबी गरे। उनले र्याफ्टिङ कुनै रहर र कहर नभई विशुद्ध पर्यटन प्रर्वद्धनका लागि भएको उल्लेख गरे।
प्रतिक्रिया दिनुहोस !
