विश्वभर आज : बेलायतमा पाइलटहरुको हड्तालदेखि तालिबानीसँग अमेरिकी वार्ता पहल

काठमाडौँ : आज पनि विश्वका केही मुलुकमा ठूला घटना भए । जसले संसारकै ध्यान तानेका छन् । खासगरी बम हमला, आन्दोलन, वार्ता असफल जस्ता केही मानव निर्मित घटनाले विश्वका प्रभावशाली देशलाई आकर्षित गरे । प्रस्तुत छन् केही मुख्य समाचार :

---

बुर्किना फासोमा बम हमला, २९ जना मारिए

बुर्किना फासो : बुर्किना फासोमा दुई अलग बम हमलामा कम्तिमा २९ जना मारिएका छन् । बुर्किना फासोको उत्तरी क्षेत्रस्थित खाद्यान्न र यात्रु बोकेर गुडिरहेका दुई फरक ट्रकमाथि हमला भएको यहाँको सरकारले जनाएको छ ।

सरकारका प्रवक्ता रेमिस फुल्गान्स डान्जिनोका अनुसार मृत्यु हुने अधिकांश व्यापारीहरु थिए । संसारकै गरिबमध्ये पर्ने मुलुक बुर्किना फासोमा २०१५ देखि हतियारधारी समूहले विद्रोह गर्दैआएका छन् । र यस्ता समूहको संख्या बढ्ने क्रम छ । यही महिनाको सुरुमा उत्तरी क्षेत्रस्थित सैनिक क्याम्पमा हमला गर्दा २४ जना मारिएका थिए ।यहाँ सक्रिय विद्रोही समूह छिमेकी मालीबाट सुरु भएको बताइन्छ ।

तालिबानसँग फेरि वार्ता हुन्छ : अमेरिकी विदेशमन्त्री

काबुल : अमेरिकी विदेशमन्त्री माइक पोम्प्योले तालिबानी समूहसँग भंग भएको वार्ता फेरि सुरु हुने बताएका छन् । दुई पक्षबीच वार्ताको तयारी भइरहँदा अफगानिस्तानमा बिहीबार तालिबानी समूहले विस्फोट गराएपछि वार्ता भंग भएको थियो ।

घटनापछि तालिबानी समूह वार्ताको लागि लचिलो भएको कुरा व्यवहारमा नदेखिएको पोम्प्योको गुनासो थियो । अमेरिकी राष्ट्रपति डोनल्ड ट्रम्पले तालिबान र अफगानिस्तानका प्रतिनिधिबीच यही शनिबार हुने भनिएको वार्ता रोकेका थिए ।

त्यसपछि नै त्यहाँका विदेशमन्त्री माइकले वार्ताको सम्भावना नटरेको भन्दै आशा व्यक्त गरेका हुन् । फक्स न्युजका लागि अन्तर्वार्ता दिँदै माइकले यस्तो बताए । उनले वार्ता फेरि सुरु हुनेमा विश्वास व्यक्त गरेका हुन् ।

तालिबानीलाई वार्ताको लागि युद्ध रोक्न अफगान सरकारको आग्रह

काबुल : तालिबानी विद्रोही समूहलाई युद्ध रोक्न र काबुलसँग प्रत्यक्ष वार्तामा आउन अफगान सरकारले आग्रह गरेको छ । अमेरिकी राष्ट्रपति डोनल्ड ट्रम्पले शनिबार अफगान सरकारसहित तालिबानीसँग वार्ताको तयारी गरिरहँदा स्थगित भएपछि अफगान सरकारको यस्तो आग्रह आएको हो ।

अफगान सरकारले विज्ञप्ति जारी गर्दै तालिबानी समूहले हमला रोकेर युद्धविराम गरेपछि मात्रै वास्तविक शान्ति वार्ता सम्भव भएको जनाएको हो । साथै सरकारले जारी गरेको विज्ञप्तिमा आफूहरु शान्ति वार्ताको पक्षमा रहेको पनि बताइएको छ ।

‘हामीसँग वार्ताको लागि शर्तहरु छैनन, तर शान्तिसँग केही शर्त हुन्छन् । उनीहरुले हत्या रोक्नुपर्छ । हिंसालाई निरन्तरता दिएरै वार्तामा बस्न कसरी सम्भव हुन्छ ? प्रष्ट शंकेत के छ भने तालिबान शान्तिका लागि इच्छुक छैनन !’

भारतको चन्द्रयान–२ को प्रशंसा गरिन् पाकिस्तानी खगोलविद्ले

नयाँदिल्ली : पाकिस्तानी पहिलो महिला खगोलविद्को रुपमा चिनिने नमिरा सलीमले भारतले चन्द्रमामा पठाएको चन्द्रयान–२ बारे खुलेर प्रशंसा गरेकी छन् । एक ऐतिहासिक काम भएको भन्दै भारतको उक्त कदमको तारिफ गरेकी हुन् ।

उनले भनिन्, ‘म भारत र आईएसआरओको चन्द्रमाको दक्षिणी ध्रुवमा विक्रम ल्यान्डरको सफ्ट ल्याण्डिङको प्रयासको सह्राना गर्छु । चन्द्रयान–२ दक्षिण एसियाको लागि मात्रै नभएर पूरा विश्वको अन्तरिक्ष उद्योगका लागि गर्वको विषय हो ।’

वैज्ञानिकहरुका अनुसार ७ सेप्टेम्बरमा चन्द्रयान–२ चन्द्रमाको सतह भन्दा २ किलोमिटर परसम्म पुग्दा सम्पर्कमा थियो । यसपछि सम्पर्कविहीन भएको बताइन्छ ।
आईएसआरओका वैज्ञानिकहरु अझै सम्पर्कको पहल गरिरहेको बताएका छन् ।

पाकिस्तानी खगोलविद् नमिराले अन्तरिक्षमा दक्षिण एसियाको प्रयास उल्लेखनीय रहेको बताएकी थिइन् । साथै कुन देशबाट पठाइयो भन्ने कुराले केही फरक नपर्ने पनि उनको भनाइ थियो । नमिरा पाकिस्तानको तर्फबाट अन्तरिक्षमा जाने पहिलो महिला हुन् ।

श्रीलंकामा हात्तिको आक्रमणबाट १८ घाइते

कोलम्बो : श्रीलंकाको एक बुद्धिष्ट कार्यक्रममा प्रदर्शन गराइएको एउटा हात्तिले आक्रमण गर्दा १८ जना घाइते भएका छन् । गत रातिको कार्यक्रममा उपस्थित मान्छेको भीडलाई हात्तिले अचानक आक्रमण गर्न थालेको हो ।

कोट्टेस्थित गरिएको उक्त बुद्धिष्ट कार्यक्रमको देराना टेलिभिजनले भिडियो सार्वजनिक गरेको थियो । हात्तिको आक्रमणसँगै मान्छेहरुको भागदौड नै मच्चिएको थियो । घटनामा घाइतेहरुलाई दुईवटा अस्पतालमा उपचार गराइँदै छ । जसमध्ये केहीको डिस्चार्ज भइसकेको छ ।

चीनको व्यापार नीतिमाथि भारतीय विदेशमन्त्रीको कडा आलोचना

नयाँदिल्ली : भारतीय विदेशमन्त्री एस जयशंकरले चीनको एकपक्षीय व्यापार नीतिको आलोचना गरेका छन् । खुला व्यापार सम्झौताको सहजिकरण नगरेकोमा गुनासो गर्दै उनले चीनका नीतिमाथि टिप्पणी गरेका हुन् ।

सिंगापुरस्थित ‘प्यानल डिस्कसन’मा उनले यस्तो बताएका हुन् । मन्त्री जयशंकरले यस क्रममा ‘अपारदर्शी बजार, र ‘चिनियाँ संरक्षणवादी नीति’बारे आलोचना गरे । र त्यस्ता नीतिले गर्दा दुई देशबीचमा संकट पैदा भएको उनले बताए । प्यानल डिस्कसनमा सिंगापुरका विदेशमन्त्री भिभियन बालाकृष्णन पनि सहभागी थिए ।

बेलायतमा तलब माग्दै पाइलट हड्तालमा, सबै उडान रद्ध

लण्डन : बेलायतमा ब्रिटिश एयरवेजले पाइलटहरुको हड्तालका कारण लगभग सबै उडान रद्ध गरेको छ । अन्तर्राष्ट्रिय मिडियाका अनुसार तलब विवादका कारण पाइलटहरु हड्तालमा छन् ।

ब्रिटिश एयरलाइन्सको १ सय वर्षको इतिहासमा यसलाई सबैभन्दा ठूलो हड्ताल मानिएको छ । कम्पनीका प्रवक्ताले एयरलाइन्सले हरेक दिन उडान भर्ने आफ्ना ८५० वटा उडान रद्ध गरेको हो ।

टेलिग्राफको समाचार अनुसार पाइलटको हड्तालबाट २ लाख ८० हजार मानिस प्रभावित बनेका छन् । यसबाट ८० मिलियन पाण्ड नोक्सान हुने बताइन्छ । न्युयोर्क, हङकङ, दिल्ली, जोहानेसबर्ग लगायत सहरमा जाने उडान रद्ध गरिएको छ । तलब र भत्ता कटौती भएको भन्दै असन्तुष्ट पाइलटहरु हड्तालमा उत्रिएका हुन् ।
अगस्ट २३ मा उनीहरुले दुईदिने हड्तालको घोषणा आह्वान गरेका हुन् ।