यूएस ओपन टेनिस : नाडालले जिते १९औं ग्रान्डस्लाम
![यूएस ओपन टेनिस : नाडालले जिते १९औं ग्रान्डस्लाम](https://annapurnapost.prixacdn.net/media/albums/Rafael-Nadal-US-open-tenish-19th-winner_20190910022040_OSkl738kqu.jpg)
न्युयोर्क : ग्रान्डस्लाम टेनिस प्रतियोगिता ‘यूएस ओपन’ को पुरुष एकलतर्फको उपाधि स्पेनिस खेलाडी राफेल नाडालले जितेका छन् । दोस्रो वरीयताका नाडालले सोमबार खेलिएको फाइनलमा रुसी खेलाडी ड्यानिल मेदभेदेभलाई हराउँदै उपाधि चुमेका हुन् । पाँच सेटसम्म चलेको फाइनलमा ३३ वर्षीय नाडालले पाँचौं वरीयतामा आसीन मेदभेदेभलाई हराउन ठूलै संघर्ष गर्नु प¥यो ।
पहिलो र दोस्रो सेटको नतिजालाई नाडालले क्रमशः ७-५ र ६-३ अंकले आफ्नो पक्षमा पारेका थिए । त्यसपछि लयमा फर्किएका २३ वर्षीय मेदभेदेभ तेस्रो र चौथो सेटको नतिजालाई क्रमशः ७-५ र ६-४ ले आफ्नो पक्षमा पारेका थिए । प्रतिस्पर्धात्मक खेलको फाइनल सेट पनि निकै प्रतिस्पर्धात्मक बनेको थियो ।
तर, अन्तिम समेटको खेलमा अनुभवी खेलाडी नाडालका अगाडि मेदभेदेभको केही लागेन । पाँचौं सेटको नतिजालाई ६-४ ले आफ्नो पक्षमा पार्दै नाडालले उपाधि चुमे । नाडालले जितेको यो १९औं ग्रान्डस्लाम उपाधि हो । उनले हालसम्म १२ पटक फ्रेन्च ओपन, चार पटक यूएस ओपन, दुई पटक विम्बल्डन र एक पटक अस्ट्रेलियन ओपनको उपाधि जितेका छन् ।
नाडालले यसअघि सन् २०१७ मा यूएस ओपनको उपाधि चुमेका थिए । उनले यसै वर्ष अर्को ग्रान्डस्लाम प्रतियोगिता फ्रेन्च ओपनको उपाधि पनि जितेका थिए । मेदभेदेभ भने पहिलो पटक ग्रान्डस्लाम प्रतियोगिताको फाइनलमा पुगेका हुन् । यसअघि उनी ग्रान्डस्लाम प्रतियोगितामा चौथो चरणभन्दा अगाडि बढ्न सकेका थिएनन् । उनी यसै वर्ष अस्ट्रेलियन ओपनको चौथो चरणमा पुगेका थिए ।
मेदभेदेभ फ्रेन्च ओपनमा पहिलो चरण र विम्बल्डनमा तेस्रो चरणभन्दा अगाडि बढ्न सकेका छैनन् । फाइनलमा नाडालले मेदभेदेभलाई हराउन चार घण्टा ५० मिनेट समय खर्चिएका थिए । नाडाल अब ग्रान्डस्लाम प्रतियोगितामा चर्चित स्विस खेलाडी रोजर फेडेररभन्दा केवल एक उपाधि पछाडि छन् । ३८ वर्षीय नाडालले २० वटा ग्रान्डस्लाम उपाधि जितिसकेका छन् ।
‘यो मेरो खेल जीवनको सबैभन्दा महŒवपूर्ण क्षण हो’, खेलपछि नाडालले भने, ‘फाइनल खेल मैले सोचेभन्दा निकै प्रतिस्पर्धात्मक भयो । पक्कै पनि भेदभेदेभ क्षमतावान् खेलाडी हुन् । अन्तिम समयसम्म उनले मलाई निकै कडा चुनौती दिए ।’ मेदभेदेभले पनि नाडालको प्रशंसा गरे । उनले खेल नाडाललाई १९औं उपाधिका लागि बधाई दिए । ‘म केवल नाडाललाई बधाई दिन चाहन्छु । एउटै खेलाडीले १९ वटा ग्रान्डस्लाम उपाधि जित्नु चानचुने उपलब्धि होइन’, उनले भने ।
यसपटक महिला एकलतर्फको फाइनलमा भने अप्रत्याशित नतिजा आएको थियो । फाइनलमा उत्कृष्ट खेल पस्कँदै १९ वर्षीया क्यानेडियन खेलाडी बियान्का एन्ड्रेस्कुले उपाधि चुमेकी थिइन् । उनले फाइनलमा आफूभन्दा करिब दोब्बर उमेरकी अनुभवी अमेरिकी खेलाडी सेरेना विलियम्सलाई ६-३, ७-५ अंकले हराउँदै उपाधि हात पारेकी हुन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)