काठमाडौं : काठमाडौंको ठूलो पर्व येंया पून्हि (इन्द्रजात्रा) हेर्न ४८ विदेशी पाहुना काठमाडौं आएका छन् । काठमाडौं महानगरपालिकाले इन्द्रजात्रा हेर्न भगिनी सम्बन्ध भएका ६ देशका १३ नगरबाट ५ प्रमुखसहित ४८ पाहुनालाई काठमाडौं डाँकेको हो । शुक्रबार बिहान करिब ९ बजे बसन्तपुरमा ती पाहुनालाई सांस्कृतिक झाँकी सहितको टोलीले भब्य स्वागत गरिएको छ ।
पाहुनालाई काठमाडौं भित्रका थुप्रै बाह बहि, बिहार, ऐतिहासिक सम्पदा क्षेत्रहरुमा परिक्रमा समेत गराइएको छ । काठमाडौंका प्राचीन बस्ती, भुकम्पपछि पुन निर्माण हुँदै गरेका मठमन्दिरका साथै पाहुनालाई इन्द्रजात्रामा हुने सबै किसिमका साँस्कृतिक गतिविधिको फोटो प्रदर्शनीमा समेत सामेल गराइएको छ ।
भ्रमणले भिजिट नेपाल २०२० लाई प्रवद्र्धन गर्ने काठमाडौं महानगरपालिकाका मेयर विद्या सुन्दर शाक्यले बताएका छन् । पाँच देशका प्रमुख इन्द्रजात्रा हेर्न आउने भनिए पनि शुक्रबार चीनका दुई, भारत र भुटान गरी एक-एक प्रमुख मात्र उपस्थित थिए । भ्रमणमा चीनको ल्हासाका प्रमुख गुहेओ गुहेओ, भुटानको थिम्पु नगरका प्रमुख किन्ले दोर्जे आएका छन् । त्यस्तै, भारतको इस्ट दिल्ली म्युनिसिपल कर्पोरेसनका प्रमुख अञ्जु कमलकान्त र नर्थ दिल्ली म्युनिसिपलबाट प्रमुख सरदार अभतार सिंहको नेतृत्वको टोली जात्रा अवलोकन गर्न काठमाडौं आइसके । बंगलादेशको ढाका साउथ सिटी कर्पोरेसनका प्रमुख मोहम्मद सहिद खोकन भने स्वास्थ्य ठिक नभएका कारण भ्रमणमा उपस्थित नभएको मेयर शाक्यले बताए ।
महानगरले औपचारिक रूपमा पहिलो पटक यसरी पाहुना डाँकेको हो । अवलोकन गर्न आउने पाहुनाले इन्द्रजात्राका मूर्त-अमूर्त पक्षको अवलोकन गर्नुका साथै वसन्तपुरलगायत महानगरभित्रका सहरी क्षेत्र, स्वयम्भू, बौद्धनाथ क्षेत्र, चन्द्रागिरि, ललितपुरको पाटन र भक्तपुरको दरबार स्क्वायर भ्रमण गर्नेछन् ।
टोली भदौ २६ गते काठमाडौं आइपुगेको हो । भदौ ३० गते सबै पाहुना आ-आफ्नो देश प्रस्थान गर्ने छन् ।
प्रतिक्रिया दिनुहोस !
