बाजुरा : वर्षाका कारण पहिरो जाँदा बाजुराको साफे-मार्तडी सकडखण्ड अवरुद्ध भएको छ।
शुक्रबार राति परेको वर्षाले बुढीगंगा र बडीमालिका नगरपालिका सीमाक्षेत्रलगायत विभिन्न ठाउँमा गएको पहिरोले उक्त सडकखण्ड अवरुद्ध भएको जिल्ला प्रहरी कार्यलय बाजुराका प्रमुख प्रहरी निरीक्षक जनक ढुंगानाले जानकारी दिए।
बुढीगंगा नगरपालिकाको अमकोटमा पहिरो बगिरहेको छ। सडक चिरा परेकाले यातायात सञ्चालनमा समस्या भएको हो। सडक संचालनको प्रयास भए पनि पहिरो नरोकिँदा समस्या भएको प्रहरीको भनाइ छ। 
सडक संचालनको लागि एक्साभेटर आवश्यक देखिन्छ। तर तत्काल एक्साभेटर उपलब्ध नभएकाले त्यसको लागि पहल भइरहेको प्रमुख जिल्ला अधिकारी गंगाप्रसाद न्यौपानेले बताए। पहिरो रोकिए आइतबारसम्म सडक खुल्ने उनको भनाइ छ।
पहिरोले सडक भासिएपछि करिब पचास मिटर बाटोमा नयाँ ट्रयाक खोल्नुपर्ने र त्यसको लागि पहिरो रोकिनुपर्ने न्यौपानेको भनाइ छ। 
प्रतिक्रिया दिनुहोस !
