काठमाडौं : शुक्रबार धुमधामका साथ चौथो संविधान दिवस मनाइएको छ । राष्ट्रपति विद्यादेवी भण्डारी, उपराष्ट्रपति नन्दबहादुर पुन र प्रधानमन्त्री केपी शर्मा ओली, सभामुख कृष्णबहादुर महरा, राष्ट्रिय सभाका अध्यक्ष गणेश तिमल्सिनालगायत संवैधानिक निकाय र सुरक्षा निकायका प्रमुखको उपस्थितिमा दिवस मनाइएको हो ।
दिवसको अवसरमा नेपाली सेनाले विभिन्न सैन्य कौशल प्रदर्शन गरेको छ । कार्यक्रमलाई सम्बोधन गर्दै राष्ट्रपति भण्डारीले संविधानको सफल कार्यान्वयन भइरहेको बताइन् । उनले संविधान निर्माणमा एक भएका दल अब पनि मिलेर अघि बढ्ने विश्वास व्यक्त गरिन् ।
कार्यक्रमलाई सम्बोधन गर्दै प्रधानमन्त्री केपी शर्मा ओलीले मुलुकले काँचुली फेर्ने र नेपालीका सपना पुरा हुने विश्वास दिलाए । ‘राष्ट्रिय दिवसको यस अवसरमा म फेरि प्रतिवद्धता जाहेर गर्छु, मुलुकले काँचुली फेर्छ, हाम्रा सपनाहरु पूरा हुन्छन्– हुन्छन् । यस अभियानको नेतृत्वमा अहिले म छु’, उनले भने, ‘धैर्य गरौं– अढाई शताब्दीदेखि खजमजिएको थिति, अढाई वर्ष नपुग्दै दुरुस्त किन भएन भन्ने जस्ता प्रश्नहरुमाथि एकचोटी पुनर्विचार गरौं ।’ 
ओलीले आजको दिनलाई स्वतन्त्रता दिवश र प्राप्त उपलब्धिको गर्व गर्ने उत्सवसमेत भएको बताए । ‘दशकौंसम्म संघर्षमा हेलिएका जसले पीडा झेलेका छन्÷बुझेका छन्, तिनका लागि आजको दिन गौर गाथाले भरिएको दिवस हो’, प्रधानमन्त्री ओलीले भने, ‘पारिवारिक विछोड, उत्पीडन र छटपटीबाट उन्मुक्ति पाएका सबै नेपालीका लागि आजको दिन, स्वतन्त्रता दिवस पनि हो । प्राप्त उपलब्धिप्रति गर्व गर्ने उत्सव हो ।’
प्रधानमन्त्री ओलीले संविधान दिवसलाई नेपालीको सबैभन्दा ठूलो चाड र र राष्ट्रिय एकता दिवसको रुपमा सम्झनुपर्ने बताए । ‘असोज ३ गते आज, हाम्रो संविधान दिवस हो, हामी नेपालीको राष्ट्रिय दिवस हो’, प्रधानमन्त्री ओलीले भने, ‘चाडवाडको रुपमा सबैभन्दा ठूलो चाड हो । तीनवटै तहमा क्रियाशील हाम्रा ७ सय ६१ सरकारको सक्रियतामा सिङ्गो मुलुकभरी नै मनाईंदै गरेको एकता दिवस हो ।’
संविधान दिवसको कार्यक्रमलाई सम्बोधन गर्दै (नेकपा) संसदीय दलका उपनेता सुवास नेम्वाङले संविधान निर्माणमा सबैको योगदान रहेको सम्झना गरे । उनले संविधानमा असन्तुष्टि भए जनतालाई विश्वासमा लिएर संशोधन गर्दै अघि जानुपर्ने बताए । 
प्रतिक्रिया दिनुहोस !
