काठमाडौं : लगानी बोर्डले निजगढ एयरपोर्ट निर्माणका लागि लगानी सम्मेलनका क्रममा आशय पेश गर्नेमध्येबाट स्वीस कम्पनी ज्यूरिच एयरपोर्ट एजीसँग विस्तृत प्रस्ताव (रिक्वेस्ट फर प्रपोजल-आरएफपी) माग्ने भएको छ ।
बोर्डको सोमबार बिहान बसेको बैठकले आशयपत्र पेश गर्ने ६ प्रस्तावक मध्येबाट ज्यूरिच एयरपोर्ट एजीलाई योग्य ठहर्याएको हो । यो कम्पनीले स्वीजरल्याण्डसहित एयरपोर्ट निर्माण, सञ्चालन तथा व्यवस्थापनको काम गर्दै आएको छ ।
लगानी बोर्डको बिहान बसेको बैठकले ज्यूरिचको आशयका आधारमा आरएफपी माग्ने निर्णय गरेको लगानी बोर्डका सीईओ महाप्रसाद अधिकारीले जानकारी दिए । विमानस्थलको अनुमानित लागत ३ अर्ब अमेरिकी डलर छ।
आरएफपी मूल्यांकनपछि उपयुक्त भएमा सार्वजनिक-निजी साझेदारीमा विमानस्थल निर्माणका लागि सम्झौता प्रक्रिया अघि बढाइने बताइएको छ । त्यस्तै, काठमाडौं उपत्यकामा बाहिरी चक्रपथ निर्माणका लागि चाइना कम्युनिकेसन कम्पनीसँग आरएफपी माग गरिने भएको छ । बाहिरी चक्रपथका लागि चार प्रस्ताव परेका थिए ।
त्यस्तै, तल्लो अरूण जलविद्युत् आयोजनाका लागि तीनै प्रस्तावकसँग आरएफपी माग्ने निर्णय भएको अधिकारीले बताए । तीनैको आरएफपी मूल्यांकनपछि उपयुक्त ठहरिएको कम्पनीलाई निर्माणको जिम्मा दिइने अधिकारीले बताए ।
अरूण तेश्रो निर्माण गरिरहेको सतलज जलविद्युत् निगम (एसजेभीएन) ले पनि तल्लो अरूणका लागि प्रस्ताव गरेको छ । चीनको चाइना पावर कम्पनी र जापानको जे पावर वाटरले पनि तल्लो अरूण निर्माणका लागि आशय व्यक्त गरेका थिए । आरएफपी मूल्यांकनपछि उपयुक्त कम्पनी छनौट गरिने लगानी बोर्डले उल्लेख गरेको छ।
प्रतिक्रिया दिनुहोस !
