कालिकोट : जिल्लाको रास्कोट नगरपालिकामा नेत्रबिक्रम चन्द विप्लव नेतृत्वको नेपाल कम्युनिस्ट पार्टीले सरकारविरुद्ध प्रदर्शन गरेको छ। मंगलबार सरकारद्वारा प्रतिबन्धित नेकपाले जिल्लाको रास्कोट नगरपालिकाको आरसिपी बजारमा मार्चपास सहित विरोध प्रदर्शन गरेको हो।
सरकारको प्रतिबन्धको सामना गर्दै आफुहरु निरन्तर क्रान्तिको बाटोमा अघि बढिरहेको भन्दै नेकपाका नेता बिराटले जस्तोसुकै चुनौती र अवरोधको सामना गरेर पनि एकीकृत जनक्रान्तीलाई सफल बनाउने उद्घोष गरे। सत्तारुढ कम्युनिस्ट पार्टीले कम्युनिस्ट मुल्य, मान्यता र विचारको बदनाम गरिरहेको तर यथार्थमा उनीहरु कम्युनिस्ट नभएको उनको आरोप छ। उनले भने, 'अहिलेको प्रक्रियाबाट शान्ति र समृद्धि सम्भव छैन। नेकपाको अभियानमा विभिन्न ढंगले सहयोग गर्न बुद्धिजीवी, शिक्षक, कर्मचारी र आम जनतालाई अपिल गर्दछु।'
कार्यक्रममा नेकपा निकट दलित मुक्ति मोर्चाका केन्द्रीय सचिवालय सदस्य साहसीले बैज्ञानिक समाजवादी व्यवस्थामा मात्र दलितको हक अधिकार सुनिश्चित हुने बताए। उनले विगतको १० वर्षे जनयुद्धमा दलित समुदायले गरेको लगानी र बलिदानी अहिलेको सत्रारुढ नेकपाले बेची खाएको आरोप लगाए। उनले भने, 'हामीले विगतको दश वर्षे जनयुद्धमा गरेको लगानी र बलिदानीको अपमान भएको छ। यसको बदलामा आम दलित समुदायहरु एकीकृत जनक्रान्तिको पक्षमा उभिन जरुरी छ। प्रचण्ड र केपी ओलीले कम्यूनिष्टको खोल ओडेर आम सर्वहारा वर्गहरुको बलिदानी र नेपाली जनताको चाहानाको होली खेलेका छन्।' कार्यक्रममा नेपाल कम्युनिस्ट पार्टीका जिल्ला सेक्रेटरी मनीलाल ऐडी रणदीपले नेकपाको जनपक्षीय नीति कार्यक्रमदेखि तर्सिएर वर्तमान सरकारले आफूहरुप्रति प्रतिबन्ध लगाएको बताए। उनले पार्टीले निर्देशन गरे एकै रातमा सम्पुर्ण स्थानीय सरकार कब्जामा लिने क्षमता आफुसंग रहेको भन्दै सरकारको दमन नरोकिए आफ्नो धैर्यताको बाँध टुट्न सक्ने चेतावनी दिए।
वर्तमान सरकारले जनताबीच गरेको बेइमानीको बदलामा ठुलो मुल्य चुकाउनुपर्ने उनको भनाइ थियो। कार्यक्रममा नेकपा निकट युवा संगठन नेपालका कर्णाली ब्युरो संयोजक शितल विष्टले राष्ट्र र जनताको मुक्तिका लागि आफुहरु जुनसुकै प्रकारको बलिदान गर्न तयार रहेको बताए। कार्यक्रममा नेकपा कालिकोट जिल्ला सदस्य तथा एरिया न. ३ का इन्चार्ज कञ्चन शाही लगायतका वक्ताले पनि सरकारको चर्को आलोचना गर्दै गाँउगाँउबाट आफूहरुको पक्षमा जनमत उठिरहेको दाबी गरे। विरोध सभासँगै नेकपाले युवा संगठन र दलित संगठनको जिल्ला भेला पनि सम्पन्न गरेको छ।
प्रतिक्रिया दिनुहोस !
