ताप्लेजुङ : फुङलिङ बजारको तोक्मेडाँडा हटियादेखि बुद्धचोक घुम्तीसडकको कालोपत्रे निर्माणको एक महिना नपुग्दै भत्किएको छ ।
ठेकेदारको लापरवाहीका कारण आठ सय मिटर सडकमध्ये अधिकांश भागको कालोपत्रे भत्किएको हो । ठेकेदारले कार्य सम्पन्न गरेको भन्दै भुक्तानी लगिसकेका छन् । भत्किएको देख्दा देख्दै सघन सहरी तथा भवन निर्माण आयोजना झापाले अनुगमन गरेर पास गरेको स्थानीयको गुनासो छ ।
मैनाचुली निर्माण कम्पनीले गत असारमा पिच र ढलान गरेको थियो । ‘असारे झरीमा रातदिन नभनी कालोपत्रे गरे । उतिबेलै भत्कन थालेको हो,’ सडक छेउमा घर भएका मदन गौतमले भने । २ वटा सोला बत्ति समेत बल्न छाडेको उनले बताए ।
निर्माण कम्पनीले मात्रा नमिलाइकन काम गरेकाले भत्किएको सडक रहेको वडा फुङलिङ नगरपालिका ४ का वडाध्यक्ष जितेन चेम्जोङले बताए । ‘पिच धेरै कमसल छ । २० सेन्टिमिटर गिटीको वेश नै छैन, त्यसैले भत्किएको हो,’ चेम्जोङले भने ।
निर्माण व्यावसायीले स्थानीय तहसँग समन्वय नै नगरी काम गरेको चेम्जोङको गुनासो छ । ‘सडकमा सिधै भलको पानी पस्छ र जम्छ, त्यहामाथि गाडी कुदेपछि भत्कन थाल्छ,’ स्थानीय विवेक राई भन्छन् ।
१५ महिनामा सक्नेगरी २०७४ असारमा सहरी विकास तथा भवन निर्माण विभाग डिभिजन कार्यालय, इलाम ठेक्का लगाएको थियो । कार्यालयहरुको पुर्नसंरचनापछि केन्द्रले सघन शहरी तथा भवन निर्माण आयोजना झापालाई जिम्मा दियो । सम्झौतामा निर्माण कम्पनीले ३ करोड ७ लाखमा पिच गर्ने, केही स्थानमा ढलान गर्ने र ३५ वटा सोलार बत्ति जडान गर्नुपर्ने उल्लेख रहेको सघन शहरी तथा भवन निर्माण आयोजना झापाले जनाएको छ ।
ठेकेदारले काम गुणस्तरहिन गरेको भन्ने आफूले जानकारी पाएको आयोजनाका इञ्जिनियर विनोद सिंह पनि बताउँछन् । उनले भने, ‘त्यो सडकको विषयमा यहाँ चिठी आएको छ । भदौ १३ गते निर्माण व्यावसायीलाई यथार्थ जानकारी दिन पत्र कटिसकेका छौँ ।’
प्रतिक्रिया दिनुहोस !
