सार्क मन्त्रीस्तरीय बैठक : भारतीय विदेशमन्त्री बाहिरिएपछि पाकिस्तानी विदेशमन्त्रीको प्रवेश
असोज १०, २०७६ शुक्रबार १३:२१:०
न्यूयोर्क : भारत–पाकिस्तान विवादका बीच न्युयोर्कमा सार्क विदेशमन्त्री स्तरीय बैठक सम्पन्न भएको छ । कश्मीर विवादलाई लिएर भारत–पाकिस्तानबीच तिक्तता बढेको छ । सोही कारण विदेशमन्त्री स्तरीय बैठक उपलब्धिमूलक हुन नसकेको सहभागीले जनाएका छन् ।
सार्क अध्यक्षका नाताले बैठकको आयोजना नेपालले गरेको थियो । बैठकको अध्यक्षता परराष्ट्र मन्त्री प्रदीप ज्ञवालीले गरेका थिए ।
भारत र पाकिस्तानले बैठक बहिष्कार त गरेनन् तर नेपाली समयअनुसार शुक्रबार बिहान भएको बैठकमा दुई देशका मन्त्री सँगै सहभागी भएनन् ।
भारतीय विदेशमन्त्री यस जयशंकर सुरुमै पुगेका थिए । उनी महासभाअन्तर्गतका सहायक बैठकमा व्यस्त रहेको कारण देखाएर बाहिरिएका थिए । त्यसपछि पाकिस्तानी विदेशमन्त्री साह महमद कुरेसी बैठकस्थल प्रवेश गरेका थिए ।
विगत चार वर्षदेखि सार्क शिखर सम्मेलन हुन नसक्दा कैयन् प्रक्रिया अवरुद्ध छन् ।
बैठकमा सार्क राष्ट्रअन्तर्गत परराष्ट्र तथा विदेश मामिला हेर्ने मन्त्रीका साथै महासभामा सहभागी विभिन्न मुलुकका प्रतिनिधि सहभागी थिए । बैठक दक्षिण एसिया क्षेत्रको बृहत्तर विकासमा केन्द्रीत रहेको परराष्ट्रमन्त्री ज्ञवालीले बताए।
मन्त्री ज्ञवालीले अन्नपूर्णसँग भने, ‘बैठक सफलतापूर्वक सम्पन्न भएको छ । ’ उनले सबै सदस्य राष्ट्र आर्थिक विकास, औद्योगिक, पर्यटन लगायतका क्षेत्रमा सहयकार्य गर्दै अगाडि बढ्नुपर्ने एकमत देखिएको बताए । ‘समस्या समाधान गर्दै सार्कलाई अझै सकारात्मक र बलियो बनाउन सकिन्छ भन्ने मान्यता सबैको पाएँ,’ उनले भने, ‘पछिल्ला घटनाक्रमले सार्क क्षेत्रमा जटिलता थपिएको छ । यसको समाधान वार्ताबाटै हुन्छ भन्नेमा हामी सकारात्मक छौं ।’
मन्त्री ज्ञवालीका अनुसार पाकिस्तानले १९औं शिखर सम्मेलन गर्न तयारी रहेको जानकारी गराएको छ । पाकिस्तानले शिखर सम्मेलन गर्न तयार रहेको बताउँदै आए पनि भारतले अस्वीकार गर्दा अवरुद्ध भएको हो ।
बैठकमा भारतीय विदेशमन्त्री जयशंकरले आफ्नो मुलुक एकताबद्ध दक्षिण एसियाका पक्षमा रहेको बताएका थिए । बैठकले श्रीलंकाबाट प्रस्तावित महासचिवको नाम स्वीकार गरेको छ । वर्तमान महासचिवको कार्यकाल आगामी फेब्रुअरीमा सकिँदै छ ।
मन्त्री ज्ञवाली बिहीबार नै अतिविकसित मुलुकका मन्त्रीहरुको बैठक र महासभा बैठकका अध्यक्षले बोलाएको आणविक हतियारसम्बन्धी उच्चस्तरीय बैठकमा सहभागी भए । महासभामा मन्त्री ज्ञवालीले नेपाली समयअनुसार शनिबार बिहान सम्बोधन गर्ने कार्यक्रम छ ।
प्रतिक्रिया दिनुहोस !
