भक्तपुर : नेपाली कांग्रेसका वरिष्ठ नेता रामचन्द्र पौडेलले नेपालका कम्युनिस्टहरु असफल भइसकेको र उनीहरुबाट नेपाल अघि बढ्न सक्दैन भन्ने तथ्य पुस्टि भइसकेको दाबी गरेका छन् ।केपी ओली नेतृत्वको सरकारले दुई वर्षको अवधिमै कम्युनिस्टहरु असफल भएको सावित गरेको उनको दाबी थियो ।
प्रजातन्त्र सेनानी स्व.जानकीप्रसाद कुइँकेलको १७औं स्मृतिसभालाई शनिबार भक्तपुरमा सम्बोधन गर्दै पौडेलले नेपाली जनतामा कम्युनिस्टप्रतिको मोहभंग भइसकेको बताए ।
उनले समृद्धि ल्याउँछु भनी सपना देखाएको कम्युनिष्ट सरकारको पालामा भ्रष्टाचार र महंगीमात्रै बढेको बताए । ‘नेपाली जनतामा कम्युनिस्ट सरकारले चमत्कारै गर्ला भन्ने विश्वास थियो । समृद्धिको ठूलै सपना देखाइएको थियो । जनता सपनामा भुलेका पनि थिए’, नेता पौडेलले भने, ‘तर अहिले आएर त्यो झूट थियो, भूलभूलैया थियो भन्ने सावित भयो भयो ।’ उनले कम्युनिस्टले नेपाल नचल्ने र समृद्धि तथा सुशासनसमेत नआउने ठोकुवा गरे ।
नेता पौडेल कम्युनिस्ट आफ्नै कारण सकिन लागेको भन्दै कम्युनिस्टको अन्त्यबाट कांग्रेसले पनि पाठ सिक्नुपर्नेमा जोड दिए । कम्युनिस्ट सिद्धान्तमै कमजोरी रहेकैले नेपालमा पनि कम्युनिस्टहरु सकिने दिशा गएको उनको जिकिर थियो ।
‘कम्युनिष्ट सिद्धान्तमै कमजोरी थियो, विरोधाभाष र अन्तरद्वन्द्व थियो’, नेता पौडेलले थपे, ‘त्यसैले कम्युनिस्टहरु नेपालमा पनि आफ्नै कारणले सकिँदैछन्।’
‘राजा गइसके, अब आउँदैन’
नेपाली कांग्रेस भक्तपुर क्षेत्र नं. १ ले आयोजना गरेको कार्यक्रममा वरिष्ठ बोल्दै नेता पौडेलले गइसकेको राजतन्त्र पुनः नआउने दावी गरे । राजाको विकल्पकारुपमा जनताले राजनीतिक पार्टीलाई मानिसकेको उनको भनाइ थियो ।
‘गइसकेको राजतन्त्र फर्केर आउँदैन । राजा र राणा गइसके । त्यसैले जनताको आशाको केन्द्र अब राजनीतिक पार्टीहरु हुन्’, उनले भने, ‘जनताले पत्याएका राजनीतिक दलहरुमा कांग्रेस र कम्युनिस्ट हुन् ।’
कम्युनिस्टले जनताको आशा र भरोषामा घात गरिसकेकोले अबको विकल्प नेपाली कांग्रेसमात्रै भएको उनको जिकिर थियो।
प्रतिक्रिया दिनुहोस !
