काठमाडौं : रेस्लिङ च्याम्पियनसिपमा जमुना तामाङले दोहोरो जित हात पारेकी छन्। पहिलो खेलमा शान्ता धामीलाई पराजित गरेकी जमुनाले दोस्रोमा लक्ष्मी घर्तीमगरलाई हराइन्।
नेपाल महिला रेस्लिङ फाउन्डेसनले विजया दशमीका अवसरमा आयोजना गरेको प्रतियोगिताको अन्य खेलमा भगवती खड्का (युनिका)ले सिर्जना कोजू तथा गीता जिरेलले तनु ठकुरीलाई पाखा लगाए।
विजेतालाई ट्रक व्यवसायी संघका अध्यक्ष जनार्दन फुयाल, एलएसएए मल्टिपर्पोज कम्पनी प्रालिकी प्रोप्राइटर लक्ष्मी श्रेष्ठलगायतले पुरस्कृत गरे। प्रतियोगितालाई फुयालले ५० हजार तथा श्रेष्ठले १० हजार नगद पनि प्रायोजन गरेका थिए।
अन्य प्रायोजकमा ज्योति विकास बैंक, महालक्ष्मी बैंक, नेपाल दूरसञ्चार प्राधिकरण र होङ्सी सिमेन्टले प्रायोजन गरेको आयोजकले जनाएको छ। शान्तिनगरमा भएको एकदिने प्रतियोगितामा अस्मिता जुरेलीले निर्णायकको भूमिका निर्वाह गरेकी थिइन्।
प्रतिक्रिया दिनुहोस !
