काठमाडौं : गायक रामकृष्ण ढकालको एक चर्चित गीत छ, ‘बिहान उठ्नेबित्तिकै हिमाल देख्न पाइयोस् ।’ जब देशपे्रम जाग्छ, नेपालीहरू यो गीत गुनगुनाउन थाल्छन् । हिमाल हेर्ने इच्छा राख्नु र हिमाललाई नै पे्रम गर्नुमा भने फरक छ ।
पन्ध्र वर्षअगाडि नेपालका हिमशृंखलाबाट लोभिएर एक फ्रान्सेली नागरिक नेपाल प्रवेश गरे । ती फ्रान्सेलीको नाम हो, मिसेल मी । सन् २००५ मा उनी नेपाल भ्रमणमा आएका थिए । उनलाई सगरमाथा चढ्ने ठूलो इच्छा थियो । आफ्नै देशमा हुँदा उनी त्यहीँका स्थानीय पर्वतशृंखलाको आरोहण गरिरहन्थे ।
फ्रान्समा हिमालनजिकै मिसेलको गाउँ छ । त्यसैले पनि उनी हिमालसँग बढी नजिक छन् । तर दुर्भाग्य ! हिमाल चढ्ने क्रममा उनी दुर्घटनामा परे । उक्त दुर्घटनामा उनका दुवै खुट्टामा गहिरो चोट लाग्यो । तर दुर्घटनापछि पनि मिसेलको हिमालप्रेम कत्ति पनि कम भएन । उनी आफ्नो रुचिप्रति झन् एकाग्र भएर लागे ।
आँखामा चस्मा, हँसिलो अनुहारका मिसेल नेपालका प्रायः सबै हिमशृंखलाको ज्ञान राख्छन् । उनी गर्वसाथ भन्छन्, ‘मलाई नेपालका प्रायः हिमालका बारेमा थाहा छ ।’
युवावस्थामै दुर्घटनामा परेका मिसेलका दुवै खुट्टामा स्टिल राखिएको छ । नेपालका भौगोलिक कठिनाइ चिर्दै चिप्लो, अप्ठ्यारो र भिराला बाटाहरूमा निस्फिक्री हिँड्न उनलाई हिमालहरूले नै सिकायो ।
सानैदेखि प्रकृतिसँग नजिक रहन मन पराउने उनी नेपालको प्रकृति, कलासंस्कृति र नेपालीमाझ छिट्टै घुलमिल भए । फोटोग्राफी र लोकसंगीतमा विशेष रुचि राख्ने मिसेलका लागि नेपाल दोस्रो घर भएको छ । नेपाल आउने जाने क्रममा मिसेल नेपालका कुनाकन्दरा पुगेका छन् । उनले यहाँका मठन्दिर, हिमाली भूभाग, महाभारत पर्वत, नदीनाला, सुन्दर गाउँहरू र नेपाली जनजीवन झल्काउने थुप्रै सुन्दर तस्बिर आफ्नो क्यामेरामा कैद गरेका छन् । तस्बिर खिच्दाखिच्दै उनले पन्ध्र वर्षमा झन्डै ३० हजार फोटो नेपालकै मात्र खिचेका रहेछन् । भन्छन्, ‘यति धेरै फोटो खिचेको पत्तै भएन । फोटो प्रदर्शनीका लागि तस्बिर छान्न मात्र दुई÷तीन महिना लाग्यो ।’
नेपालका हिमाल, पहाड, तराई घुमेर संग्रह गरेका तस्बिरलाई मिसेलले पाटन संग्रहालयमा प्रदर्शनीमा ल्याएका छन् । एक सय आठ तस्बिरले भरिएको उक्त प्रदर्शनीमा आउने पर्यटकहरू नेपालको प्राकृतिक तथा सांस्कृतिक सुन्दरता एकै ठाउँमा देख्न पाउँदा दंग मान्दै थिए ।
‘नेपाल प्रकृतिमा निकै धनी छ तर संरक्षणको अभाव छ’, मिसेलले नेपालमा बिताएका पन्ध्र वर्ष यो एक वाक्यमा व्यक्त गर्दै भने । १७ सेप्टेम्बरबाट सञ्चालनमा आएको फोटो प्रदर्शनी एक महिनासम्म सञ्चालन हुनेछ ।
प्रतिक्रिया दिनुहोस !
