जनकपुरधाम : जनकपुरस्थित बुद्ध एयरको काउन्टर तोडफोड आरोपमा पक्राउ परेका सांसद प्रमोदकुमार साह रिहा भएका छन्। राष्ट्रिय जनता पार्टी (राजपा) नेपालका साहलाई जिल्ला अदालत धनुषाले साधारण शुक्रबार तारेखमा रिहा गरेको हो।
सर्लाही क्षेत्र नम्बर १ बाट निर्वाचित साहलाई जिल्ला अदालत धनुषाका न्यायाधीश तेजप्रसाद पौडेलको एकल इजलासले साधारण तारेखमा रिहा गर्न आदेश दिएको हो। शुक्रबार जिल्ला अदालतमा थुनछेक बहस भए लगत्तै साधारण तारेखमा छोड्ने आदेश दिएको स्रेस्तेदार यज्ञप्रसाद आचार्यले जानकारी दिए।
गत सोमबार जनकपुर विमानस्थलमा बुद्ध एयरको विमान ढिलो (डिले) भएको भन्दै काउण्टर तोडफोड गरेपछि सांसद साह मंगलबार काठमाडौंस्थित त्रिभुव नअन्तर्राष्ट्रि विमानस्थलबाट पक्राउ परेका थिए।
पक्राउ लगत्तै उनलाई जनकपुर ल्याइएको थियो। बुधबार जिल्ला अदालत धनुषाले उनलाई चार दिनको म्याद थपेर हिरासतमा राखेर अनुसन्धान गर्न आदेश दिएको थियो।
नागरिक उडड्यन प्राधिकरणले सांसद साहमाथि गैर सैनिक हवाई उडान ऐन २०१५ अन्तर्गत तोडफोड मुद्दा जिल्ला प्रहरी कार्यालय धनुषामा दर्ता गराएपछि प्रहरीले उनलाई पक्राउ गरेको थियो। सांसद साह पक्राउ परेपछि राजपा नेपालका कार्यकर्ताले विरोध गर्दै आएका थिए।
प्रतिक्रिया दिनुहोस !
