बैतडीमा उपनिर्वाचनको चहलपहल : नेकपाले टुंगो लगायो दुई वडाका उम्मेदवार
कात्तिक ९, २०७६ शनिबार १६:२७:०
बैतडी : आगामी मंसीर १४ गते हुने उपनिर्वाचनका लागि बैतडीमा चहलपहल बढेको छ । उपनिर्वाचन हुने वडामा चुनावी सरगर्मी बढेको हो । सुर्नया गाउँपालिका–१, दोगडाकेदार गाउँपालिका– ४ र पुर्चौंडी नगरपालिका–४ मा वडा अध्यक्षका लागि उपनिर्वाचन हुँदैछ ।
सत्तारुढ नेपाल कम्युनिस्ट पार्टी (नेकपा)ले दोगडाकेदार गाउँपालिका–४ र सुर्नया गाउँपालिका–१ मा उम्मेद्वारको टुंगो लगाएको छ । सम्बन्धित पालिका कमिटिको सिफारिश अनुसार दोगडाकेदार ४ मा नरेन्द्रप्रसाद भट्ट र सुर्नया गाउँपालिका– १ मा धनबहादुर चन्दलाई उम्मेद्वार बनाउने निर्णय भएको नेकपाका कार्यालय सचिव प्रजापति जोशीले जानकारी दिए ।
नेकपाको जिल्ला कार्यालयको बैठकले शनिबार उम्मेद्वारको नाम स्वीकृत गरेको जोशीले बताए । बैठकले केही दिनभित्रै पुर्चौंडी नगरपालिका ४ मा पनि उम्मेद्वारको टुंगो लगाउने निर्णय गरेको उनले बताए ।
नेकपाले दुईओटा वडामा उम्मेद्वारको टुंगो लगाएपनि अन्य दलहरुले भने अहिलेसम्म उम्मेद्वारी टुंग्याउन सकेका छैनन् ।
प्रतिक्रिया दिनुहोस !
