रोल्पा : उप-निर्वाचन हुने मिति नजिकिँदै गएपनि रोल्पाको थबाङ गाउँपालिका १ मा चुनावी चहलपहल सुरु भएको छैन । सधैं चर्चामा रहिरहने थबाङमा चुनावी माहोल शून्यजस्तै छ । थबाङ गाउँपालिका १ का वडाध्यक्ष फर्कबहादुर बुढाको निधन भएकाले यहाँ उपनिर्वाचन हुन लागेको हो। मस्तिष्कघात कारण बुढाको असार ६ गते मृत्यु भएको थियो ।
बुढा नेत्रविक्रम चन्द 'विप्लव' नेतृत्वको नेकपाका स्थानीय नेता भएपनि स्वतन्त्रबाट उम्मेदवार बनेर वडाध्यक्षमा विजयी भएका थिए । पार्टीले चुनाव बहिस्कारको नीति लिएको भएपनि २०७४ असार १४ गतेको स्थानीय तहको निर्वाचनमा थबाङमा विप्लव नेतृत्वको नेकपा सम्बद्ध नेता कार्यकर्ताले स्वतन्त्रबाट उम्मेदवारी दिएका थिए ।
नेपाली कांग्रेससँग गठबन्धन गरी चुनावमा भाग लिएका उनीहरु वडा नम्बर २ मा अध्यक्षसहित चार सदस्य विजयी भएका थिए । पूर्व माओवादी केन्द्रको उम्मेदवार ग्रिस पुनमगरलाई स्वतन्त्र उम्मेदवार बुढाले १ सय ३ मत अन्तरले पराजित गरेका थिए ।
बुढाले ३ सय ५९ मत लिएका थिए भने प्रतिद्वन्द्वी पुनमगरले २ सय ५६ मत प्राप्त गरेका थिए।प्रतिबन्धित अवस्थामा विप्लव नेतृत्वको नेकपाका स्थानीय नेताले उपनिर्वाचनमा पनि स्वतन्त्र उम्मेदवारी दिने हुन या नदिने भन्ने केही खुलेको छैन ।
चुनाव बहिस्कार नीति लिएकै बेला स्वतन्त्र उम्मेदवार रहेपनि उपनिर्वाचनमा प्रतिबन्धित अवस्थाले अन्यौलता देखिएको छ । 'थबाङमा चुनावमा को को उम्मेदवार होलान् भन्ने चासो लिन थालिएको छ । तर, चुनावी चहलपहल भने छैन, 'स्थानीय समेत रहेका नेपाल पत्रकार महासंघ ५ नम्बर प्रदेश अध्यक्ष मौसम रोकामगरले भने, 'स्वतन्त्र वा अन्य दल कसैले पनि अझैंसम्म उम्मेदवार खडा गरेका छैनन् । प्रचारको काम पनि भएको छैनन्।'
कम्युनिस्ट किल्लाको रुपमा चर्चित थबाङमा कहिले शून्य र कहिले शतप्रतिशत मतदान हुँदै आएको इतिहास छ । चुनाव बहिस्कारको नीति लिएपनि विप्लव नेतृत्वको नेकपाका थबाङी नेता कार्यकर्ताले 'थबाङको सापेक्षता' मा भन्दै स्वतन्त्रबाट स्थानीय चुनावमा भाग लिएपछि फेरि थबाङ चर्चामा आएको थियो । उपनिर्वाचनमा पुनः भाग लिन्छन् या लिदैनन् भन्ने चासो बढेको छ ।
प्रतिबन्धित नेकपाले प्रभाव क्षेत्र मानेको वडा नम्बर २ मा उपचुनाव होला या नहोला ? भए कस्तो होला ? को को चुनावमा उत्रिने हुन् भन्नेबारे गाउँमा चासो छ । प्रतिबन्धित नेकपाका स्थानीय व्यवस्थापनमा स्वतन्त्रबाट उम्मेदवार खडा गर्छन् या गर्दैनन् भनेर पर्ख र हेरको नीतिमा अन्य दलहरु देखिएका छन् । प्रतिबन्धित नेकपाकै कार्यकर्ताले स्वतन्त्रबाट अहिले वडाध्यक्ष पदमा उम्मेदवारी दिएमा अन्य उम्मेदवार नभइदिए हुने भन्ने मनोविज्ञान पनि देखिएको छ ।
नेकपा र कांग्रेसले उम्मेदवार उठाउने
चुनावको मिति नजिकिदै गर्दा सत्ताधारी नेकपा र नेपाली कांग्रेसले उम्मेदवार उठाउने अन्तिम टुंगोमा पुगेका छन् । नेकपा नेता थबाङ पुगेर उम्मेदवार चयनबारे स्थानीय नेता कार्यकर्तासँग परामर्श गरिसकेका छन् ।
केही दिनअघि नेकपा नेता समेत रहेका ५ नम्बर प्रदेश सांसद दिपेन्द्रकुमार पुन र नेकपाका जिल्ला अध्यक्ष सुरेन्द्र घर्ती (थापा) थबाङका पगेका हुन् । 'उम्मेदवार चयनबारे स्थानीय नेता कार्यकर्तासँग परामर्श गरियो, 'अध्यक्ष घर्तीले भने, 'अनौपचारिक रुपमा उम्मेदवार चयन गरिसक्यौं । औपचारिकमा सिफारिस गर्न बाँकी छ ।' स्थानीय चुनावमा प्रतिद्वन्द्वी बनेका ग्रिस पुनमगरलाई नै उम्मेदवार बनाउने नेकपाको रणनीति छ ।
नेपाली कांग्रेसले कमल रोकालाई उम्मेदवार बनाउने भएको छ । पूर्व राज्यमन्त्री समेत रहेका नेपाली कांग्रेसका जिल्ला सभापति अमरसिंह पुनले भने, 'स्वतन्त्रबाट कोही उम्मेदवार बने सघाउने भन्ने थियो । त्यो संभावना रहेन । अब कांग्रेसले उमेदवार खडा गर्छ ।'
स्थानीय तहको चुनावमा सहकार्य गरेका विप्लव नेतृत्वको नेकपाले नै पुनः स्वतन्त्र उमेदवार उठाएमा समर्थन गर्ने कांग्रेसको रणनीति थियो । पाँचवटा वडा रहेको थबाङ गाउँपालिकामा एकवटा वडामा स्वतन्त्रले जितेको भएपनि पाँच वडा र गाउँपालिकाको अध्यक्ष र उपाध्यक्ष पूर्व माओवादी केन्द्रले जितेको थियो ।
पूर्व एमाले र माओवादी केन्द्र एकता भएकाले स्वतन्त्र उम्मेदवार बनेन् भने उपनिर्वाचनमा सत्ताधारी नेकपाको प्रभाव रहने देखिन्छ । उपनिर्वाचनबारे विप्लव नेतृत्वको नेकपाले कस्तो रणनीति लिन्छ भन्नेबारे यसै भन्न सकिने अवस्था छैन ।
प्रतिक्रिया दिनुहोस !
