काठमाडौं : त्रिभुवन विश्वविद्यालयको उपकुलपति बन्न नेपाल मेडिकल काउन्सिलका पूर्वअध्यक्ष प्राध्यापक डा. धर्मकान्त बास्कोटालाई बाटो खुला भएको छ । दसैंअघि शिक्षामन्त्रीको अध्यक्षतामा रहेको उपकुलपति सर्च कमिटीले बास्कोटासहित तीन जनाको नाम प्रधानमन्त्री तथा विश्वविद्यालयका कुलपति केपी शर्मा ओलीलाई सिफारिस गरेको थियो ।
त्यतिखेर पहिलो नम्बरमा वरिष्ठ मुटु रोग विशेषज्ञ डा. भगवान कोइराला पहिलो नम्बरमा तथा दोस्रो नम्बरमा बास्कोटाको नाम सिफारिस गरिएको थियो । तेश्रो नम्बरमा राष्ट्रिय परीक्षा बोर्डका अध्यक्ष प्राध्यापक डा. चन्द्रमणि पौडेलको नाम थियो ।
सामान्यतया सर्च कमिटीले पहिलो नम्बरमा सिफारिस गरेका व्यक्तिलाई उपकुलपति बनाउने चलन थियो । तर प्रधानमन्त्रीको रोजाइमा रहेका बास्कोटालाई दोस्रो नम्बरमा सिफारिस गरिएको थियो ।
पहिलो नम्बरमा रहेका कोइराला आइतबार मात्र नेपाल मेडिक काउन्सिलको अध्यक्ष नियुक्त भएका छन् । बास्कोटाको कार्यकाल सकिएपछि काउन्सिल अध्यक्षविहिन थियो । कोइरालालाई उपकुलपति बनाउन विश्वविद्यालयका सहकुलपति समेत रहेका शिक्षामन्त्री पोखरेलले जोड गरेका थिए । प्रधानमन्त्रीको रोजाइमा भने बास्कोटा थिए ।
नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’को रोजाइमा भने पौडेल थिए । कोइराला काउन्सिल अध्यक्ष भएपछि बास्कोटा सहजै उपकुलपति हुने विश्वविद्यालयका प्राध्यापकबीच चर्चा सुरु भएको छ ।
प्रतिक्रिया दिनुहोस !
