पाँचपल्ट सूचना निकाल्दा पनि रकम लिन आएनन् अस्थायी शिक्षक
![पाँचपल्ट सूचना निकाल्दा पनि रकम लिन आएनन् अस्थायी शिक्षक](https://annapurnapost.prixacdn.net/media/albums/paisa_20180524071749_lzBMLzWKJ8.jpg)
काठमाडौं : आन्तरिक प्रतिस्पर्धामा अनुत्तीर्ण भएपछि 'गोल्डेन ह्याण्डसेक' लिएर सेवाबाट अवकास भएका अस्थायी शिक्षक पटक-पटक अनुरोध गर्दा पनि रकम लिन आएका छैनन् । सामुदायिक विद्यालयमा शिक्षण पेशालाई निरन्तरता दिन नपाउने भएपछि उनीहरुलाई सेवा अवधि गणना गरेर रकम दिने व्यवस्था सरकारले गरेको छ । अस्थायी शिक्षकलाई व्यवस्थापन गर्न शिक्षक सेवा आयोगले गत वर्ष आन्तरिक प्रतिस्पर्धा गराएर परीक्षा लिएको थियो ।
प्राथमिक, निम्न माध्यमिक र माध्यमिक तहका गरेर २२ हजार ७६ कोटामा २३ हजार ३ सय ८६ अस्थायी शिक्षकले प्रतिस्पर्धा गरेका थिए । तीमध्ये करिब ११ हजार शिक्षक मात्र परीक्षामा उत्तीर्ण भएका थिए । बाँकीलाई गोल्डेन ह्याण्डसेक दिएर घर पठाउने शिक्षा ऐनमा व्यवस्था छ ।
उनीहरुको सेवा अवधि अनुसार पाँच देखि दश वर्ष, दशदेखि पन्ध्र वर्ष र त्यो भन्दा माथिका समेत गरि तीन तहमा आर्थिक सहायत दिनुपर्ने कानुनी व्यवस्था छ । पहिलो तहका शिक्षकलाई प्रति वर्ष हिसाब गरेर आधा महिना बराबरको रकम दिइनेछ ।
दोस्रो र तेश्रो तहका शिक्षकले क्रमसः प्रति वर्षको हिसाब गरेर एक महिना र ४५ दिनको तलब बराबरको रकम पाउने विद्यालय शिक्षक किताब खानाका उपसचिव रविन्द्र बुढाप्रिथीले जानकारी दिए । उनका अनुसार २० वर्ष भन्दा माथि जति वर्ष काम गरेपनि उनीहरुले ४५ दिन बराबरकै तलब पाउनेछन् ।
तर अनुत्तीर्ण भएका शिक्षकलाई आवश्यक कागज पत्र पेश गरेर रकम दावि गर्न शिक्षा तथा मानव स्रोत विकास केन्द्रले पाँच पटक सार्वजनिक सूचना जारी गरिसकेको छ । तरपनि रकम लिन योग्य थुप्रै शिक्षकले कागजपत्र नबुझाएको केन्द्रले बताएको छ ।
यस्ता शिक्षकलाई अन्तिम मौका भन्दै केन्द्रले कात्तिक ७ गते चौथो पटक सार्वजनिक अनुरोध गरेको छ । यसअघि गत चैत २५, वैशाख २०, जेठ ३ र असार २९ गते पनि केन्द्रले सूचना जारी गरेको थियो ।
पछिल्लो पटकको सूचना मार्फत केन्द्रले कात्तिक २० गतेभित्रमा दावि नगर्ने शिक्षकलाई आवश्यक सुविधा दिन केन्द्र वाध्य नहुने र सेवा सुविधाबाट बञ्चित भएमा सम्बन्धित व्यक्ति नै जिम्मेवार हुने चेतावनी दिएको छ। विवरण नपठाउनेमध्ये दुई नम्बर प्रदेशका जिल्लाका अस्थायी शिक्षक धेरै छन् ।
राजनितिक दलका नेताहरुले अनुत्तीर्ण स्थायी गराउने आश्वासन दिएकाले विवरण बुझाउन आनाकानी गरेको शिक्षाका एक अधिकारीले बताए । तर परीक्षामा अनुत्तीर्ण शिक्षकलाई स्थायी गराउन मिल्ने कुनै पनि कानुनी व्यवस्था छैन । शिक्षक सेवा आयोगले परीक्षा लिएर उत्तीर्ण भएका शिक्षकलाई पदस्थापनाका लागि शिक्षा तथा मानव स्रोत विकास केन्द्रमा सिफारिस गरिसकेको छ । उनीहरुले यसअघि नै पढाउन समेत सुरु गरिसकेका छन् ।
अनुत्तीर्ण भएका शिक्षकले जिल्लामा रहेको शिक्षा विकास तथा समन्वय इकाइमा आवश्यक कागजपत्र बुझाउनुपर्ने हुन्छ । ७७ वटै जिल्लामा यस्तो इकाइ छ । इकाइले शिक्षकका कागजपत्र प्रमाणित गरेपछि रकम निकासाका लागि केन्द्रमा रहेको विद्यालय शिक्षक किताव खानामा सिफारिस गर्छ।
किताव खानाले त्यही कागजको आधारमा फेरि इकाइमै रकम निकासा गर्छ । परीक्षामा अनुत्तीर्ण शिक्षकले इकाइबाट रकम लिन पाउँछन् । किताबखानाले पहिलो चरणमा गत आर्थिक वर्षमा छुट्टयाइएको ५ अर्ब २५ करोड रुपैयाँ रकम वितरण गरिरहेको छ । सबै अस्थायी शिक्षकलाई घर फिर्ता पठाउँदा ९ अर्बको हाराहारीमा रकम लाग्ने अनुमान छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)