मेरो 'पावर' छ भन्दै प्रहरीलाई घुस दिन खोजेपछि...

भैरहवा : सवारी साधन चेकजाँचका क्रममा एक युवाले तिमी प्रहरीहरु चोर हौं, मेरो पनि पावर छ भन्दै प्रहरीलाई घुस दिन खोजेपछि प्रहरीले ती युवालाई पक्राउ गरेको छ । रुपन्देहीको ओमसतिया १ ठुटिपिपलमा सवारी चेकजाँचको क्रममा मादक पदार्थ सेवन गरेर लु २५ प ८९२७ नम्बरको मोटरसाइकल र लु ३१ प ६१२१ नम्बरको स्कुटरमा सवार दुई युवाले प्रहरीलाई घुस दिन र अभद्र व्यवहार गरेपछि उनीहरु पक्राउ परेका हुन् ।

पक्राउ पर्नेमा बुटवल उपमनपा १५ का २५ वर्षीय नारायण भुषाल र ओमसतिया गापा १ का २८ वर्षीय मनिष चौधरी रहेको जिल्ला प्रहरी कार्यालय रुपन्देहीले जनाएको छ । चेकजाँचको क्रममा युवाले प्रहरीलाई धम्की दिँदै अभद्र व्यवहार गरेको प्रहरीको भनाई छ । उनीहरुलाई नियन्त्रणमा लिँदा भुषालले प्रहरीलाई ५ सय रुपैयाँ घुस दिन खोजेपछि पक्राउ गरिएको जिल्ला प्रहरी कार्यालय रुपन्देहीको प्रवक्ता प्रहरी नायब उपरीक्षक खड्कबहादुर खत्रीले बताए ।

उनका अनुसार पक्राउ परेका अभियुक्तलाई मुलुकी अपराध संहिता ऐन २०७४ को फैजदारी कसुरअन्र्तगत परिच्छेद ५ को दफा ११८ को उपदफा १ विपरीत कसुरमा अनुसन्धानमा भइरहेको छ।