काठमाडौं : नेपाली कांगेसका वरिष्ठ नेता रामचन्द्र पौडेलले पार्टीका विभिन्न कार्यक्रममा सहभागी हुन प्रदेश १ का विभिन्न जिल्लाको भ्रमणमा छन्। नेता पौडेल कार्तिक २६ गते मंगलबार मकवानपुरको हेटौडामा हुने पार्टीको केन्द्रीय नीति तथा प्रशिक्षण प्रतिष्ठानले आयोजना गरेको प्रदेश नम्बर ३ स्तरीय प्रशिक्षण कार्यक्रममा सहभागी हुँदैछन्। यो कार्यक्रमपछि पौडेल झापा जाने कार्यक्रम रहेको उनका नीजि सचिव चिरिन्जीवी अधिकारीले जानकारी दिए।
यस्तै कार्तिक २७ गते पौडेल बाराको निजगढ र सिरहाको लाहान जानेछन्। पौडेलको प्रदेश नम्बर १ का जिल्लाहरुको भ्रमण सुरु झापाबाट गर्ने कार्यक्रम छ । उनले कार्तिक २८ गते नेपाली कांग्रेस झापा जिल्ला कार्यसमितिको आयोजनामा हुने बृहद कार्यकर्ता भेलालाई सम्बोधन गर्ने कार्यक्रम छ । कार्तिक २९ गते पौडेलले झापाबाट इलाम जानेछन्।
त्यसैगरी कार्तिक ३० गते इलामबाट पाँचथर जाने र पाँचथरको फाल्गुनान्द गाउँपालिकाको चुनावी सभालाई सम्बोधन गर्ने कार्यक्रम छ । यस्तै मंसीर १ गते पाँचथरबाट ताप्लेजुङ्ग जाने र नेपाली कांग्रेस ताप्लेजुङ्गले आयोजना गरेको बृहत कार्यकर्ता भेलालाई सम्बोधन गर्नेछन्।
प्रतिक्रिया दिनुहोस !
