ओखलढुंगा : दाङका एक युवालाई ओखलढुंगा जिल्ला अदालतले जन्मकैदको सजाय सुनाएको छ । मोलुङ गाउँपालिका ३ का २७ वर्षीय सन्तोष कार्कीको घरैमा आइ हत्या गरेको अभियोगमा दाङको भालुवाङका ३७ वर्षीय संजितकुमार थापालाई जिल्ला अदालतले सोमबार साँझ जन्मकैद सजाय फैसला सुनाएको हो ।
जिल्ला न्यायधीश दलबहादुर केशीको इजलाशले कर्तव्य ज्यान मुद्दामा कसुर ठहर गर्दै २५ वर्ष कैद सजायको फैसला गरेको अदालतका श्रेस्तेदार नेत्रबन्धु पौड्यालले बताए । दुवई प्रहरीमा कार्यरत थापाले आफ्नी पत्निसित अनैतिक सम्बध राखेको आरोपमा कार्कीको ०७५ भदौ ५ गते अपराह्न ४ बजे मोलुङ गाउँपालिका ३ स्थित पीडितकै घरमा गइ खुकुरी प्रहार गरि हत्या गरेका थिए ।
कार्कीको खुकुरी प्रहारबाट शरिरभरि चोट लागेको र अत्याधिक रगत बगेको अवस्थामा घरभित्रै शव फेला परेको थियो । हत्या गरेर भागेका आरोपितलाई प्रहरीले ०७५ भदौ १२ गते निजकै घर छेउ दाङको भालुवाङबाट पक्राउ गरेको थियो । भदौ १३ गते ओखलढुंगा प्रहरीले बुझेर १४ गते कर्तव्य ज्यान मुद्दा दर्ता गरेको थियो ।
प्रहरीले क्रुर अमानवीय तवरले यातना दिएर हत्या गरेको कसुरमा आजन्म काराबासको सजाय माग दावी गरे पनि क्रुर तरिकाले यातना दिएर हत्या नगरेको, आरोपितले अभियोग स्वीकारको देखिएकाले जन्म कैद (२५ वर्ष) कर्तव्य ज्यानमा कसुर ठहर भइ सजाय तोकिएको अदालतले जनाएको छ ।
अनुसन्धानका क्रममा थापाले अभियोग स्वीकार गरेका थिए भने आवेशमा हत्या गरेको बयान दिएका थिए।
प्रतिक्रिया दिनुहोस !
