काठमाडौं : नेपाल स्काउटका पाँचजना सल्लाहकारले सामूहिक राजीनामा दिएका छन् । संस्था सञ्चालनको वर्तमान गतिविधीप्रति असन्तुष्टि जनाउँदै उनीहरुले राजीनामा दिएका हुन् ।
उनीहरुले सोमबार नै युवा तथा खेलकुदमन्त्री जगतबहादुर विश्वकर्मालाई राजीनामा बुझाएका हुन् । खेलकुदमन्त्री प्रमुख स्काउट रहने कानूनी व्यवस्था छ । राजीनामा दिनेहरुमा गोविन्द नारायण ज्यापु, रामवदन जोशी, श्रीराम लामिछाने, पुष्पलता भट्टराई रविन दाहाल छन् ।
युवा तथा खेलकुद मन्त्रालयले २०७५ पुस १६ गते गोविन्द नारायण ज्यापु, रामवदन जोशी, श्रीराम लामिछाने, पुष्पलता भट्टराई, ध्रुवराज शर्मा, रविन दाहाल र चन्दन कौशिकलाई सल्लाहकारमा नियुक्त गरेको थियो । उनीहरु सबै स्काउटका पूर्व अध्यक्ष तथा संयोजक हुन्।
सल्लाहकारमा नियुक्त गरे पनि प्रमुख स्काउटको अध्यक्षतामा सल्लाहकारको बैठक बस्न नसकेको राजीनामा पत्रमा उनीहरुले लेखेका छन् । 'नेपाल स्काउटको परिवेश र परिस्थतीमा हामीले सल्लाहकारको हैसियतमा काम गर्ने अवस्था नदेखिएको र हाम्रो कार्यक्षेत्र पनि स्पष्ट नभएकोले माननीय प्रमुख स्काउट समक्ष यो राजीनामा पेश गरेका छौं' राजीनामा पत्रमा भनिएको छ ।
गत वर्षको पुष १६ गते नै मन्त्री स्तरिय निर्णय अनुसार लोक बहादुर भण्डारीको संयोजकत्वमा राष्ट्रिय तदर्थ समिति गठन गरिएको थियो । नेपाल स्काउटको नयाँ ऐन लागु भएको ६ महिना भित्रमा निर्वाचन सम्पन्न गरि निर्वाचित समितिलाई जिम्मेवारी हस्तान्तरण गरिने बताए पनि अहिलेसम्म नयाँ ऐन आएको छैन ।
प्रतिक्रिया दिनुहोस !
