बैतडीमा ६६ प्रतिशत मत खस्यो : ९९ वर्षीय वृद्धले गरे मतदान

बैतडी : बैतडीका ३ वडामा भएको उपनिर्वाचनमा ६६ प्रतिशत मत खसेको छ। तीनओटै वडामा ४ हजार ३३६ मतदाता रहेकोमा दुई हजार ८ सय ६६ मत खसेको जिल्ला निर्वाचन कार्यालय बैतडीले जनाएको छ। 

बैतडीको दोगडाकेदार गाउँपालिका ४, सुर्नया गाउँपालिका १ र पुर्चौंडी नगरपालिका ४ मा उपनिर्वाचन भएको हो। दोगडाकेदार गाउँपालिका ४ को केदार मावि (क) केन्द्रमा ६१६ मतदाता रहेकोमा १८६ महिला र १९१ पुरुष गरी ३७७ जनाले मतदान गरेका छन्। 

यस्तै केदार मावि (ख) केन्द्रमा ६१३ मतदाता रहेकोमा २१९ महिला १६७ पुरुष गरी ३८६ जनाले मतदान गरेका छन्। यस्तै दोगडाकेदार ४ कै हुनैनाथ आधारभूत विद्यालय केन्द्रमा ५७९ मतदाता रहेकोमा १८३ महिला र १५२ पुरुषले मतदान गरेका छन्। 

यसरी दोगडाकेदार गाउँपालिका ४ मा १ हजार ८०८ जना मतदाता रहेकोमा १ हजार ९८ जनाले मतदान गरेका मतदान अधिकृत भानदेव जोशीले जानकारी दिए। 

यस्तै सुर्नया गाउँपालिका १ मा ६१९ मतदाता रहेकामा २२८ महिला र २१० पुरुष गरी ४३८ जनाले मतदान गरेको मतदान अधिकृत मायादेवी जोशीले जानकारी दिइन्। 

यस्तै पुर्चौंडी नगरपालिका ४मा १ हजार ९०९ जना मतदाता मध्ये १ हजार ३३० जनाले मतदान गरेका छन्। पुरचौंडी ४ को पहरोल मावि बागा केन्द्रमा मा ३६५ महिला र ३२७ पुरुष गरी ६९२ जनाले मतदान गरेका छन्। 

यस्तै पुरचौंडी ४ कोमहादेव मावि सिबाबो केन्द्रमा ३१३ महिला र ३२५ पुरुष गरी ६३८ जनाले मतदान गरेका छन्। 

जिल्लाभरी उपनिर्वाचन शान्तिपूर्ण रुपमा सम्पन्न भएको मुख्य निर्वाचन अधिकृत ईश्वरीप्रसाद भण्डारीले जानकारी दिए । मतदान केन्द्रबाट मतपेटिका ल्याउने क्रम जारी रहेकाले निर्वाचन अधिकृतको कार्यालयमा मतपेटिका पुगेपछि मात्रै मतगणनाका बिषयमा निर्णय हुने उनले बताए। बैतडीमा ३ जना वडा अध्यक्षका लागि ८ जना चुनावी मैदानमा छन्।
 सुर्नया १ मा मतदानका लागि जाँदै गरेका ९६ वर्षीय महावीर चन्द। तस्बिर : भगीरथ अवस्थी
 

९९ वर्षीय वृद्धले गरे मतदान 
बैतडीमा सम्पन्न उपनिर्वाचनमा एक ९९ बर्षीय बुद्धले पनि मतदान गरेका छन्। पुर्चौडी नगरपालिका ४ मा रहेको महादेव मावि सिबावो मतदानस्थलबाट स्थानीय ९९ वर्षीय विरुवा धानुकले मतदान गरेको बैतडीका प्रमुख जिल्ला अधिकारी आनन्द पौडेलले जानकारी दिए।  

धानुकले शनिबार साढे १ बजे मतदान गरेका हुन्। मतदानमा सहभागी बुद्धले आफूले देशविकासको लागी लागीपर्ने उम्मेदवारलाई मतदान गरेको बताएका छन्। उनले भने, ‘मतदानबाट राम्रो नेतृत्व आओस भनेर मतदान गरेको हुँ।’
यस्तै सुर्नया गाउँपालिका १ मा रहेको साविकको गाविस भवन गुर्केली मतदानकेन्द्रबाट स्थानीय ९६ बर्षीय महाबीर चन्दले पनि मतदान गरेका छन्।  उनले बिहान ११ बजेर ३७ मिनेटमा मतदान गरेका हुन्। 

दोगडाकेदार गाउँपालिका ४ को  श्रीकेदार मावि पिपलकोटबाट  ९१ वर्षीया पार्वती भट्टले  पनि मतदान गरेको जिल्ला निर्वाचन कार्यालय बैतडीले जनाएको छ।